ក្រសួងសាធារណការ និងដឹកជញ្ជូន បើកឱ្យដំណើរការអនុស្ថានីយជញ្ជីងអចល័ត ស្គន់ ខេត្តកំពង់ចាម សម្រាប់ថ្លឹងយានយន្តដឹកជញ្ជូនលើសទម្ងន់កម្រិតកំណត់ ដើម្បីទប់ស្កាត់បទល្មើសយានយន្តដឹកជញ្ជូនលើសទម្ងន់កម្រិតកំណត់ និងការពារហេដ្ឋារចនាសម្ព័ន្ធផ្លូវថ្នល់ឱ្យបានជាប់ធន់តាមអាយុកាលបច្ចេកទេសសាងសង់។

យោងតាមការចុះផ្សាយរបស់ ក្រសួងសាធារណការ និងដឹកជញ្ជូន នៅថ្ងៃទី២០ ខែមេសា ឆ្នាំ២០២៦ បានបញ្ជាក់ថា អនុស្ថានីយ ស្គន់ ខេត្តកំពង់ចាម ចាប់ផ្តើមដំណើរការថ្លឹងសាកល្បងរថយន្តដឹកជញ្ជូនធុនធ្ងន់ ទាំងអស់ នឹងផ្សព្វផ្សាយអំពីបទប្បញ្ញត្តិច្បាប់, លិខិតបទដ្ឋានគតិយុត្តនានា ចាប់ពីថ្ងៃជូនដំណឹងនេះ រហូតដល់ថ្ងៃទី៤ ខែមិថុនា ឆ្នាំ២០២៦ និងអនុវត្តវិធានការតាមបទប្បញ្ញត្តិច្បាប់ និងលិខិតបទដ្ឋានគតិយុត្ត ចំពោះរថយន្តដឹកជញ្ជូនលើសទម្ងន់កម្រិតកំណត់ ចាប់ពីថ្ងៃទី៥ ខែមិថុនា ឆ្នាំ២០២៦ តទៅ។

ដូចនេះ ក្រសួងសាធារណការ និងដឹកជញ្ជូន ជំរុញឱ្យសាធារណជន ពិសេសសមាគមដឹកជញ្ជូនទំនិញផ្លូវគោក សមាគមភ្នាក់ងារបញ្ជូនទំនិញកម្ពុជា ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ អ្នកបើកបររថយន្តធុនធ្ងន់ និងអ្នកពាក់ព័ន្ធទាំងអស់ ចូលរួមសហការជាមួយមន្ត្រីមានសមត្ថកិច្ចដែលបំពេញ ភារកិច្ចប្រចាំការនៅទីតាំងអនុស្ថានីយជញ្ជឹងអចល័តថ្លឹងយានយន្តដឹកជញ្ជូនលើសទម្ងន់កម្រិតកំណត់ដោយគោរពអនុវត្តតាមបទប្បញ្ញត្តិច្បាប់ និងលិខិតបទដ្ឋានគតិយុត្តជាធរមាន។

គួរបញ្ជាក់ថា អនុស្ថានីយជញ្ជីងអចល័ត ស្គន់ ខេត្តកំពង់ចាម ស្ថិតនៅលើកំណាត់ផ្លូវជាតិលេខ៧ ត្រង់ចំណុចគ.មលេខ៥+៤២០ ក្នុងភូមិព្រៃខ្ជាយ ឃុំសំរោង ស្រុកព្រៃឈរ ខេត្តកំពង់ចាម ចំណុះឱ្យស្ថានីយជញ្ជឹងអចល័ត ថ្នល់កែង ខេត្តកំពង់ចាម៕