ឪពុកម្តាយភាគច្រើនដោយសារតែមមារញឹកនឹងការងារពេកគឺមិនសូវមានពេលយកចិត្តទុកដាក់នឹងកូននោះទេ ជាពិសេសមិនបានផ្តោតលើអាកប្បកិរិយារបស់កូននោះឡើយ លុះពេលកូនធំឡើងក្លាយជាក្មេងចេះភូតភរមិនស្មោះត្រង់ទើបនឹកស្តាយក្រោយគឺវាហួសពេលហើយ។ ខាងក្រោមនេះជាសញ្ញា៣យ៉ាង ដែលអ្នកគួរតែសង្កេតឱ្យមែនទែន៖

១.ទម្លាប់នៃជម្លោះជាមួយឪពុកម្តាយ៖ ឪពុកម្តាយជាច្រើនស្រឡាញ់កូនរបស់ពួកគេខ្លាំងណាស់ ហើយមិនដែលបន្ទោសពេលកូនរបស់ពួកគេធ្វើខុសនោះទេ។ ប៉ុន្តែនេះនឹងនាំឱ្យកូនធំឡើងដោយបុគ្គលិកលក្ខណៈដែលមានចរិតរឹងរូស។ នៅពេលដែលឪពុកម្តាយមិនអាចបំពេញតម្រូវការរបស់ពួកគេបាន នោះកូនៗនឹងទាស់ទែងជាមួយឪពុកម្តាយ ហើយចាប់ផ្តើមមានចិត្តមិនស្មោះត្រង់។

២.ឪពុកម្តាយប្រៀនប្រដៅដោយវាយដំ៖ ឪពុកម្តាយដែលប្រើរំពាត់ វាយដំ និងជេរប្រមាថ គឺជាវិធីសាស្រ្តអប់រំរបស់មនុស្សជំនាន់មុន។ បើរាល់ពេលដែលកូនធ្វើខុស ឪពុកម្តាយមានទម្លាប់វាយកូនខ្លាំងពេក ពួកគេនឹងមានស្លាកស្នាមផ្លូវចិត្តខ្លាំងនៅពេលពួកគេធំឡើង។

៣.ជៀសវាងការទទួលខុសត្រូវ៖ កុមារជាច្រើនបដិសេធមិនទទួលស្គាល់កំហុសរបស់ពួកគេ ប្រសិនបើឪពុកម្តាយរបស់ពួកគេចូលចិត្តរិះគន់ និងបញ្ចេញកំហឹងលើពួកគេពេក។ ប្រសិនបើកុមារមិនព្រមទទួលស្គាល់កំហុសរបស់ខ្លួន មិនយូរមិនឆាប់ ពួកគេនឹងរស់នៅក្នុងជីវិតអាត្មានិយមបំផុត ដោយគ្រាន់តែខ្វល់ខ្វាយពីខ្លួនឯងប៉ុណ្ណោះ។ កុមារដែលចូលចិត្តគេចពីការទទួលខុសត្រូវ ហើយមិនហ៊ានទទួលស្គាល់នូវពាក្យសម្ដី និងសកម្មភាពរបស់ពួកគេ នឹងមានការពិបាកក្នុងការយល់ដឹងពីភាពកតញ្ញូតាធម៌នៅពេលពួកគេធំឡើង។ ដូច្នេះ បើអ្នកមិនចង់ឱ្យកូនរបស់អ្នកជាមនុស្សមិនសមហេតុផលទេ អ្នកគួរតែចេះអប់រំពួកគេឱ្យត្រឹមត្រូវតាំងពីក្មេងមកម្ល៉េះ ទើបពួកគេអាចអភិវឌ្ឍបានគ្រប់ជ្រុងជ្រោយ និងរស់នៅប្រកបដោយក្រមសីលធម៌ល្អបំផុត៕