ការចិញ្ចឹមកូនមិនមែនជារឿងដែលងាយស្រួលនោះឡើយ ដូច្នេះហើយ ក្នុងនាមជាឪពុកម្ដាយត្រូវតែជាគម្រូដ៏ល្អសម្រាប់កូនៗរៀនសូត្រ និងត្រាប់តាម។ ឪពុកម្ដាយដែលល្អ ទើបកូនគោរពកោតខ្លាច ជាពិសេស បុគ្គលដែលជាឪពុក កូនៗភាគច្រើន តែងតែស្ដាប់ និងត្រាប់តាមឪពុក យកឪពុកមកធ្វើជាគម្រូ។ ហេតុនេះហើយ ឪពុកទាំងឡាយ អ្នកត្រូវតែចេះអំពីរបៀបដើម្បីអប់រំ ទូន្មាន ប្រៀនប្រដៅដល់កូនៗ។ ទាំងនេះ គឺជារបៀបចិញ្ចឹមកូនទាំង ៥ ឪពុកគួរតែដឹង។

១. នៅពេលដែលកូនមិនចូលចិត្តការសិក្សា អ្នកត្រូវតែបង្រៀនកូនពីបញ្ហា ការលំបាកភាពនឿយហត់ទៅថ្ងៃមុខ ៖ មានកូនខ្លះគាត់មិនចង់រៀនសូត្រទេ ខ្ជិលមិនស្តាប់។ នៅពេលនេះ ម្ដាយបានណែនាំច្រើនហើយ ប៉ុន្តែមិនបានលទ្ធផលល្អទេ។ ដូច្នេះហើយក្នុងនាមជាឪពុក ត្រូវសម្រេចចិត្តនាំកូនចេញទៅមើលថាមនុស្សខំប្រឹងយ៉ាងណា មនុស្សដែលពុំបានសិក្សា ថ្ងៃមុខត្រូវធ្វើការដោយប្រើកម្លាំងកាយ វាហត់នឿយ វាលំបាកបែបណាខ្លះ។ ការបង្ហាញកូនឱ្យដឹងពីបញ្ហា ការលំបាក ដើម្បីកែប្រែគំនិតមកខិតខំរៀនសូត្រ ដើម្បីថ្ងៃមុខអាចជួយខ្លួនឯងបានផង ក៏អាចធ្វើជាទំពាំងស្នងជួយដល់មនុស្សក្នុងសង្គមជាតិបានផងដែរ។

២. ពេលកូនមិនចាប់អារម្មណ៍នឹងការញុំាអាហារ ជាឪពុកត្រូវនាំកូនដើរ ឬរត់ឱ្យបានច្រើន ៖ នៅពេលដែលកុមារហាត់ប្រាណ ពួកគេនឹងបាត់បង់ថាមពល ដែលនឹងធ្វើឱ្យពួកគេឃ្លាន។ នៅពេលដែលរាងកាយមានសុខភាពល្អ នោះកូននឹងមានសុខភាពល្អដូចគ្នា។

៣. ពេលកូនខ្ជិលច្រអូស ឱ្យឪពុកបង្រៀនធ្វើកិច្ចការផ្ទះ ៖ ការធ្វើកិច្ចការផ្ទះនឹងជួយឱ្យកុមារអភិវឌ្ឍអារម្មណ៍នៃការទទួលខុសត្រូវ និងការឧស្សាហ៍ព្យាយាម។ ក្នុងអំឡុងពេលដំណើរការការងារ កុមារនឹងបង្កើតទម្លាប់នៃការស្ម័គ្រចិត្តធ្វើការងារផ្ទះ ការយល់ដឹងពីភាពស្អាតបាត និងជួយម្តាយរបស់ពួកគេ។

៤. នៅពេលដែលកូនខ្វះទំនុកចិត្ត ឪពុកត្រូវលើកទឹកចិត្ត និងគាំទ្រពួកគេ ៖ ប្រសិនបើកូនធ្វើមិនបានល្អ និងមានអារម្មណ៍សោកសៅ ឪពុកត្រូវតែនៅទីនោះដើម្បីលើកទឹកចិត្ត ឱ្យកម្លាំងចិត្តដល់កូន។ វាគឺជាការបញ្ជាក់ និងការលើកទឹកចិត្តរបស់ឪពុក ដែលនឹងជួយកូនឱ្យមានទំនុកចិត្តឡើងវិញ និងយកឈ្នះលើការលំបាកទាំងឡាយដែលនឹងកើតឡើង។

៥. ពេលកូនមានការភ័យខ្លាច សូមឱ្យឪពុកនាំកូនទៅលត់ដំនៅខាងក្រៅ ៖ ឪពុកអាចនាំកូនទៅដើរលេង ឬបោះជំរុំដើម្បីប្រជែងខ្លួនក្នុងធម្មជាតិ។ ក្នុងអំឡុងពេលនោះ ភាពជាដៃគូ និងការលើកទឹកចិត្តរបស់គាត់នឹងជួយកូនឱ្យកាន់តែមានភាពក្លាហាន៕