មនុស្ស ៦នាក់ រួមនឹងក្មេង៣នាក់ បានស្លាប់ នៅក្នុងអគ្គិភ័យដ៏សន្ធោសន្ធៅ ដែលបានឆាបឆេះនៅក្នុងរោងការមួយកន្លែង ក្នុងរដ្ឋប៊ីហារ ភាគខាងកើតប្រទេសឥណ្ឌា។ នេះបើតាមការចុះផ្សាយរបស់ ទីភ្នាក់ងារព័ត៌មានចិនស៊ិនហួ នាថ្ងៃទី២៦ ខែមេសានេះ។

អគ្គិភ័យ បានឆាបឆេះកាលពីយប់ថ្ងៃព្រហស្បតិ៍ ដោយសារតែការបាញ់កាំជ្រួចនៅក្នុងតំបន់ Alinagar នៃស្រុក Darbhanga ចម្ងាយប្រហែល ១៨៤គីឡូម៉ែត្រភាគឦសាននៃទីក្រុង Patna រដ្ឋធានី Bihar។

តាមប្រភពពីមន្ត្រីជំនាញ បានឲ្យដឹងថា រោងពិធីមង្គលការ បានឆាបឆេះ កំឡុងពេលផ្ទុះកាំជ្រួច ហើយឆេះរាលដាលដល់ផ្ទះក្បែរនោះភ្លាមៗ។ សេចក្តីរាយការណ៍​បន្ត​ថា ភ្លើង​ក៏​បាន​សម្លាប់​សត្វ​គោ​ ៣​ក្បាល ផងដែរ​៕