ព្រឹត្តិការណ៍សំខាន់ៗប្រចាំថ្ងៃនេះមានដូចជា៖ 

១. ក្រោយពី សម្តេចតេជោ មានប្រតិកម្មលើសារដែលលោក សាពូន មីដាដា បង្ហោះ លោកសាពូន ក៏បានចេញមុខសុំទោស

បន្ទាប់ពី លោក សាពូន មីដាដា បានបង្ហោះសារថា សម្តេចតេជោ ហ៊ុន សែន បានជួយគាត់ជាទឹកប្រាក់ចំនួន ៦,៧លានដុល្លារ ព្រមទាំងផ្ទះ និងឡាន សម្តេចតេជោ បានបង្ហោះសារបដិសេធភ្លាមៗ ធ្វើឱ្យលោកសាពូន មីដាដា សុំទោស និងបកស្រាយថាសម្ដេចជួយត្រឹមតែជាង ៤០ម៉ឺនដុល្លារប៉ុណ្ណោះ។

២. ប្រទេសតួកគីបានចោទប្រកាន់សហរដ្ឋអាមេរិកថាមានគោលនយោបាយស្តង់ដារទ្វេរលើសិទ្ធិមនុស្សក្នុងតំបន់ហ្គាហ្សា

ក្រសួងការបរទេសរបស់ប្រទេសតួកគីបាននិយាយនៅក្នុងសេចក្តីថ្លែងការណ៍មួយថា ខ្លួនមានការព្រួយបារម្ភយ៉ាងខ្លាំងដែលរបាយការណ៍របស់សហរដ្ឋអាមេរិកមិនបានឆ្លុះបញ្ចាំងឱ្យឃើញត្រឹមត្រូវអំពីការវាយប្រហារអមនុស្សធម៌ដែលកំពុងបន្តនៅក្នុងតំបន់ហ្គាហ្សា។

៣. អាមេរិកបានបញ្ជូនកាំជ្រួចរយៈចម្ងាយឆ្ងាយដោយសម្ងាត់ ដើម្បីជួយក្នុងសង្រ្គាមអ៊ុយក្រែន

ក្រុមមន្ត្រីអាមេរិកបញ្ជាក់ថា ប្រទេសអ៊ុយក្រែនបានចាប់ផ្តើមប្រើប្រាស់មីស៊ីលផ្លោងរយៈចម្ងាយឆ្ងាយ ដែលសហរដ្ឋអាមេរិកផ្ដល់ឱ្យដោយសម្ងាត់ដើម្បីប្រឆាំងនឹងការឈ្លានពានរបស់កងកម្លាំងរុស្ស៊ី។ សព្វាវុធទាំងនោះគឺជាផ្នែកមួយនៃកញ្ចប់ជំនួយចំនួន ៣០០លានដុល្លារដែលបានអនុម័តដោយប្រធានាធិបតីអាមេរិក លោក Joe Biden កាលពីខែមីនា និងបានមកដល់ក្នុងខែនេះ។

៤. ពិតជាអស្ចារ្យមែន! NASA នឹងតម្លើងប្រព័ន្ធអ៊ីធឺណេត 4G នៅលើឋានព្រះច័ន្ទ

NASA និង Nokia សហការគ្នាតម្លើងប្រព័ន្ធអ៊ីធឺណេត 4G នៅលើឋានព្រះច័ន្ទ ដែលអនុញ្ញាតឱ្យអាកាសយានិកប្រើប្រាស់ស្មាតហ្វូន កម្មវិធី និងសេវាកម្មទាំងអស់ដែលមាន ដូចពួកគេកំពុងនៅលើផែនដីអញ្ចឹង។

៥. ត្រីបាឡែនរាប់សិបក្បាលគឿងជាប់នៅលើឆ្នេរសមុទ្រដោយមិនដឹងពីមូលហេតុនៅប្រទេសអូស្ត្រាលី

ប្រព័ន្ធផ្សព្វផ្សាយក្នុងស្រុកបានរាយការណ៍នៅថ្ងៃព្រហស្បតិ៍ថា អាជ្ញាធរសត្វព្រៃនិងអ្នកស្ម័គ្រចិត្តកំពុងព្យាយាមជួយសង្គ្រោះត្រីបាឡែនរាប់សិបក្បាលដែលគឿងជាប់នៅលើឆ្នេរសមុទ្រមួយកន្លែងក្នុងប្រទេសអូស្ត្រាលី ។

៦. ហ្វូងដំរីព្រៃអាស៊ីប្រមាណ២០ក្បាល បង្ហាញខ្លួននៅស្រុកកែវសីមា ខេត្តមណ្ឌលគិរី

ប្រជាពលរដ្ឋមានការព្រួយបារម្ភជាខ្លាំង ក្រោយប្រទះឃើញហ្វូងដំរីព្រៃអាស៊ីប្រមាណ២០ក្បាល អុកឡុកចំការរបស់ពួកគាត់ នៅស្រុកកែវសីមា ខេត្តមណ្ឌលគិរី ។

៧. នាយកប្រតិបត្តិ TikTok មិនបានភ្ញាក់ផ្អើលទេដែលបានលឺថាប្រធានាធិបតីអាមេរិកបានចុះហត្ថលេខាលើច្បាប់ហាមប្រាមTikTok

នាយកប្រតិបត្តិTikTok ថាមិនភ្ញាក់ផ្អើលទេ ដែលលឺថាប្រធានាធិបតីអាមេរិកលោក Joe Biden បានចុះហត្ថលេខាលើច្បាប់មួយ ដែលអាចនាំឱ្យមានការហាមប្រាមTikTok។

៨. មន្រ្តីជំនាញត្រួតពិនិត្យឃើញ និងដុតកម្ទេចចោល សាច់ក្របីបង្កកប្រមាណជាង ៣តោន

សាខា ក.ប.ប. ខេត្តព្រៃវែង ដោយទទួលបានការស្នើសុំកិច្ចសហការពីអគ្គនាយកដ្ឋានគយ និងរដ្ឋករ បានចុះត្រួតពិនិត្យបឋមលើទំនិញ សាច់ក្របីបង្កក ចំនួន ៣ ៥០០គីឡូក្រាម ដែលអគ្គនាយកដ្ឋានគយ និងរដ្ឋាករ (គយចល័ត) ឃាត់ស្ទាក់ចាប់បាននៅតំបន់២ នៅក្នុងភូមិសាស្ត្រស្រុកបាភ្នំ ខេត្តព្រៃវែង ដោយឈ្មួញលួចនាំចូលបង្កប់ជាមួយទំនិញផ្សេង ដឹកតាមរថយន្តស៊ាំយ៉ុង។ 

៩. លោក Santa Kh រងការរិះគន់យ៉ាងខ្លាំង ខណៈប្រើកាយវិការថតរូបមិនសមរម្យ ជាមួយរូបសំណាកសេះសមុទ្របាញ់ទឹក

នៅព្រឹកថ្ងៃទី២៥ ខែមេសា ឆ្នាំ២០២៤ នេះមហាជននិយមលេងបណ្តាញសង្គមហ្វេសប៊ុកជាច្រើន កំពុងប្រតិកម្ម និងបញ្ចេញមតិរិះគន់ជាច្រើនហូរហែដល់អ្នកផលិតមាតិកាបែបកំប្លែងមួយរូបគឺលោក Santa Kh ពាក់ព័ន្ធនឹងការបង្ហោះរូបភាពបង្ហាញកាយវិការមិនសមរម្យនៅកន្លែងទេសចរណ៍មួយកន្លែងដែលកំពុងទទួលបានការចាប់អារម្មណ៍ជាខ្លាំងក្នុងក្រុងកំពត។

១០. ជនជាតិអាមេរិក ១៣១លាននាក់រស់នៅក្នុងតំបន់ដែលមានខ្យល់អាកាសមិនល្អ

ជនជាតិអាម៉េរិកប្រមាណ ១៣១លាននាក់ ត្រូវបានប៉ះពាល់ដោយសារកម្រិតនៃការបំពុលបរិយាកាសមិនល្អ នេះបើយោងតាមរបាយការណ៍របស់សមាគមសួតអាមេរិក (ALA) ២០២៤ ៕