រឿងកាន់តែក្តៅឡើងហើយ បន្ទាប់ពីមហាសេដ្ឋីដ៏ល្បីឈ្មោះលោក​ Mark Zuckerberg និងលោក Elon Musk បានប្រើពាក្យមិនសមរម្យដាក់គ្នាលើបណ្តាញសង្គមអ៊ីនធឺណេតកាលពីថ្ងៃអាទិត្យ ទី១៣ ខែសីហា ឆ្នាំ២០២៣នេះ។​

ទាក់ទងនឹងរឿងនេះដែរ ស្ថាបនិកក្រុមហ៊ុន Meta លោក​ Zuckerberg បានប្រើពាក្យធ្ងន់ៗមួយចំនួនដោយបង្ហោះសារលើវេទិកាសង្គម Threads ទៅកាន់លោក Elon Musk ថា ស្ថាបនិករូបនេះមិនបានគោរពពាក្យសន្យានៃការបបួលវាយប្រដាល់ដាក់ក្នុងទ្រុងលើសង្វ្រៀន Ultimate Fighting Championship (UFC) នៅទីក្រុង Las Vegas រដ្ឋ Nevada នោះទេ។ ខ្ញុំបានកំណត់កាលបរិច្ឆេទរួចហើយ ប៉ុន្តែលោក Musk មិនបានបញ្ជាក់នោះទេហាក់បីដូចជាមិនខ្វាយខ្វល់នូវរឿងមួយនេះ។

ពេលដែលឃើញសារទាំងអស់នេះភ្លាមលោក Musk មិនបង្អង់យូរឡើយ ដោយឆ្លើយតបភ្លាមៗនៅលើកម្មវិធី X ថា លោក Zuckerberg គឺជាមាន់។ ​ស្របពេលដែលឃើញបែបនេះក៏ស្រាប់តែអ្នកប្រើប្រាស់កម្មវិធី X បានស្នើឱ្យលោក​ Zuckerberg ត្រជាក់ចិត្តនូវពាក្យមួយនេះដោយសារតែ លោក Musk បានសំដៅទៅលើខ្សែសង្វាក់អាហាររហ័ស (Fast Food) ដ៏ពេញនិយមរបស់សហរដ្ឋអាមេរិកនោះទេ។ លោកបានបន្តទៀតថា ការប្រយុទ្ធនឹងធ្វើឡើងនៅក្នុងប្រទេសអ៊ីតាលី ខណៈដែលអាជ្ញាធរនៅទីនោះបានបញ្ជាក់ពីជំនួបពិភាក្សាអំពីការធ្វើជាម្ចាស់ផ្ទះរួចមកហើយនៃព្រឹត្តិការណ៍សប្បុរសធម៌ដ៏អស្ចារ្យ ដែលនឹងបរិច្ចាគទឹកប្រាក់រកបានពីការប្រកួតទៅមន្ទីរពេទ្យកុមារអ៊ីតាលី។​ ហើយការប្រកួតនេះលោកក៏បាននិយាយជាមួយនាយក​រដ្ឋមន្ត្រី​អ៊ីតាលី លោក Giorgia Meloni និង​រដ្ឋមន្ត្រី​ក្រសួង​វប្បធម៌រួចមកហើយ ដោយបានអនុញ្ញាតឲ្យមកប្រកួតនៅទីនោះផងដែរ។ទោះបីជាយ៉ាងណាលោក Musk នៅតែមិនព្រមបញ្ជាក់កាលបរិច្ឆេទនោះទេដោយសារតែគេសម្គាល់ឃើញកាលពីថ្ងៃសុក្រថា លោកប្រហែលត្រូវទទួលការវះកាត់ឆ្អឹងដងកាំបិតលើស្មាខាងស្តាំរបស់លោក និងត្រូវចំណាយពេលវេលាសម្រាកព្យាបាលតែប៉ុន្មានខែប៉ុណ្ណោះ ដូច្នេះវាមិនមែនជាបញ្ហា និងប៉ះពាល់ដល់សុខភាពធ្ងន់ធ្ងរនោះទេ។​

ជាការឆ្លើយតបលោក Zuckerberg បានបង្ហោះរូបថតខ្លួនគាត់ដោយគ្មានពាក់អាវហើយនិយាយថា ខ្ញុំជាមនុស្សម្នាក់ដែលចូលចិត្តក្បាច់គុន និងធ្លាប់បានចូលរួមប្រកួតកីឡា Jiujitsu នាពេលកន្លងមក ហើយខ្ញុំបានត្រៀមខ្លួនរួចជាស្រេចដើម្បីប្រយុទ្ធចាប់តាំងពីថ្ងៃដែល Musk ប្រកាសចង់ប្រកួតជាមួយខ្ញុំនាដើមខែកក្កដាមកម្ល៉េះ។ ប្រសិនបើគាត់យល់ព្រមលើកាលបរិច្ឆេទ ច្បាស់ណាស់ដំណឹងនៃការប្រកួតមួយនេះនឹងឮពីខ្ញុំ ប៉ុន្តែរហូតមកដល់ពេលនេះ ខ្ញុំអាចសន្មតថាអ្វីដែលគាត់និយាយមិនទាន់បានយល់ស្របពិតប្រាកដនោះទេ៕

សម្រួលអត្ថបទដោយ៖ Puthseyha