ការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួងរតនាគារបានកំណត់លោក កុក អាន សមាជិកព្រឹទ្ធសភាកម្ពុជាម្នាក់ និងបុគ្គលចំនួន ២៨នាក់ដែលគេនិយាយថាជាបណ្តាញរបស់លោក។

សេចក្តីប្រកាសព័ត៌មានរបស់ OFAC បញ្ជាក់ថា ប្រតិបត្តិករបោកប្រាស់អាស៊ីអាគ្នេយ៍នៅក្នុងបណ្តាញនេះបានលួចប្រាក់រាប់លានដុល្លារពីជនរងគ្រោះអាម៉េរិក ខណៈពេលដែលកំពុងធ្វើប្រតិបត្តិការក្រោមការការពាររបស់លោក កុក អាន ដោយប្រើការល្បួងនៃមិត្តភាព ឬទំនាក់ទំនងស្នេហា ជនបោកប្រាស់ទាំងនេះបញ្ចុះបញ្ចូលជនជាតិអាម៉េរិកដែលងាយរងគ្រោះឱ្យផ្ទេរប្រាក់សន្សំរបស់ពួកគេក្នុងទម្រង់ជាទ្រព្យសកម្មឌីជីថល ដោយសន្យាថានឹងមានឱកាសវិនិយោគ និងប្រាក់ចំណេញខ្ពស់ ដើម្បីលួចប្រាក់ទាំងនោះទាំងស្រុង។ ក្នុងករណីខ្លះ បុគ្គលដែលប្រព្រឹត្តការបោកប្រាស់ទាំងនេះ គឺជាជនរងគ្រោះនៃការជួញដូរមនុស្ស ហើយត្រូវបានបង្ខំឱ្យប្រព្រឹត្តអំពើខុសច្បាប់ក្រោមការគំរាមកំហែងនៃអំពើហិង្សា។

លោក កុក អាន និងបណ្តាញរបស់លោក បានដំណើរការ និងទទួលផលចំណេញពីទីតាំងឆបោក ដែលមានគោលដៅលើពលរដ្ឋអាម៉េរិក ហើយជាញឹកញាប់ ប្រើប្រាស់ជនរងគ្រោះពីការជួញដូរមនុស្ស ដែលត្រូវបង្ខំឱ្យប្រព្រឹត្តអំពើខុសច្បាប់ ក្រោមការគំរាមកំហែងនៃអំពើហិង្សា ដូចដែលបានកត់ត្រា ក្នុងរបាយការណ៍ស្តីពីការជួញដូរមនុស្ស (TIP Report) របស់ក្រសួងការបរទេសអាមេរិក។

រដ្ឋមន្ត្រីក្រសួងរតនាគារអាម៉េរិក បានអះអាងក្នុងសេចក្តីប្រកាសថា ការលុបបំបាត់ការឆបោក គឺជាអាទិភាពចម្បងសម្រាប់រដ្ឋបាលរបស់ លោក ត្រាំ ហើយក្រសួងរតនាគារនឹងបន្តកំណត់មុខសញ្ញាលើជនឆបោក និង មជ្ឈមណ្ឌលឆបោកដែលលួចប្រាក់រាប់ពាន់លានដុល្លារពីជនជាតិអាម៉េរិក ដែលខិតខំធ្វើការ ដោយមិនខ្វល់ថា ពួកគេប្រតិបត្តិការនៅទីណា ឬមានខ្សែរយៈទំនាក់ទំនងល្អប៉ុណ្ណានោះទេ៕