លោក Anutin Charnvirakul នាយករដ្ឋមន្ត្រីថៃ បានបង្ហាញការព្រួយបារម្ភយ៉ាងខ្លាំងចំពោះសុវត្ថិភាពប្រជាពលរដ្ឋនៅតាមព្រំដែនថៃ–មីយ៉ាន់ម៉ា ដោយព្រមានថា ការប្រយុទ្ធនៅក្នុងប្រទេស Myanmar មិនត្រូវឲ្យរាលដាលឆ្លងចូលមកក្នុងប្រទេស Thailand នោះឡើយ។

ថ្លែងនៅក្រសួងមហាផ្ទៃ នៅម៉ោង ១០៖១០ ព្រឹក ថ្ងៃពុធ លោកបានឲ្យដឹងថា កិច្ចប្រជុំជាប្រចាំមួយ បានចេញវិធានការជាច្រើន សម្រាប់គ្រប់គ្រងសន្តិសុខតាមព្រំដែន ខណៈការប្រយុទ្ធនៅមីយ៉ាន់ម៉ាកំពុងបន្ត។ លោកបានបញ្ជាក់ថា អាជ្ញាធរថៃកំពុងតាមដានស្ថានការណ៍គ្រប់មុំ និងមានការព្រួយបារម្ភយ៉ាងខ្លាំង។

ពាក់ព័ន្ធនឹងករណីគ្រាប់អាវុធធ្លាក់ចូលដែនថៃ លោក Anutin បានបញ្ជាក់ថា អាជ្ញាធរបានប្រើប្រាស់គ្រប់មធ្យោបាយ រួមទាំងការទំនាក់ទំនងតាមការទូត និងវិធានការសន្តិសុខ ដើម្បីការពារប្រជាពលរដ្ឋ។ ខណៈអាជ្ញាធរមីយ៉ាន់ម៉ាបានអះអាងថា ករណីនេះកើតឡើងដោយសារការប្រយុទ្ធផ្ទៃក្នុង មិនមែនជាចេតនាបំពានដែនដីថៃនោះទេ។

“យើងមិនអាចទទួលយកបានទេ។ ប្រសិនបើមានការប្រយុទ្ធ វាត្រូវតែស្ថិតនៅក្នុងដែនរបស់ពួកគេ ប៉ុន្តែមិនអាចប៉ះពាល់ដល់ប្រទេសយើងបានឡើយ” លោកបានបញ្ជាក់។

ដោយឡែក កាលពីថ្ងៃទី២០ ខែមេសា វេលាម៉ោង ១១៖០០ ព្រឹក កងទ័ពអាកាសមីយ៉ាន់ម៉ា បានប្រើយន្តហោះប្រយុទ្ធ Yak-130 និង MiG-29 បាញ់ប្រហារតាមអាកាស នៅជិតមន្ទីរពេទ្យមួយដែលដំណើរការដោយអង្គការ KNU និងលំនៅដ្ឋានប្រជាពលរដ្ឋ ក្នុងស្រុក Hpapun រដ្ឋ Karen ដែលស្ថិតប្រហែល ៥០០ ម៉ែត្រពីព្រំដែនថៃ។

ក្នុងហេតុការណ៍នោះ មានគ្រាប់បែកមួយបានធ្លាក់ឆ្លងចូលទឹកដីថៃ នៅតំបន់ទន្លេសាលវីន ជិតភូមិ Ban Mae Waen បង្កឲ្យប្រជាពលរដ្ឋថៃមានការភ័យខ្លាច និងរត់គេចចេញពីតំបន់ជាបន្ទាន់៕