អ្នកនាំពាក្យ​ក្រសួង​ព័ត៌មាន​កម្ពុជា លោក ទេព អស្នារិទ្ធ ​សម្ដែង​សោក​ស្ដាយ​​ចំពោះ​អត្ថបទ​ចុះផ្សាយ​ដោយ The Wall Street Journal ដែល​ពាក់ព័ន្ធ​នឹង​បញ្ហា​ឧក្រិដ្ឋកម្ម​អន​ឡាញ ដោយ​ប្រើប្រាស់​ភាសា និង​ការបញ្ជាក់​នៅក្នុង​អត្ថបទ​នោះ​ប៉ះពាល់​ដល់​កិត្តិយស និង​អត្តសញ្ញាណ​ជាតិ​របស់​កម្ពុជា​។​

​លោក ទេព អស្នារិទ្ធ​ បាន​ថ្លែង​ថា ការភ្ជាប់​ឈ្មោះ​ប្រទេស​កម្ពុជា​ជាមួយ​ឧក្រិដ្ឋកម្ម​សកល គឺជា​ការបង្កើត​ភាព​រើសអើង និង​បំផ្លាញ​កិត្តិយស​របស់​ប្រជាជាតិ​លើ​ឆាក​អន្តរជាតិ ដែល​ក្រសួង​ទាមទារ​ឱ្យ​មាន​ការ​កែតម្រូវ​​។​ លោក​ថា​៖ «​ការយក​ឈ្មោះ​ប្រទេស​ដែលមាន​អធិបតេយ្យភាព​មក​ភ្ជាប់​ជាមួយ​បញ្ហា​ឧក្រិដ្ឋកម្ម​សកល គឺ​បង្ហាញ​ពី​ចេតនា​បង្កើត​ការរើសអើង និង​ប៉ះពាល់​ដល់​សេចក្តីថ្លៃថ្នូរ​របស់​ប្រជាពលរដ្ឋ​កម្ពុជា​»​។​

អ្នកនាំពាក្យបានបញ្ជាក់ថា ក្រសួង​ព័ត៌មាន​បាន​ផ្ញើ​លិខិត​ទៅកាន់​និពន្ធ​នាយក​គ្រប់គ្រង​ការ​ផ្សាយ​របស់ WSJ ឱ្យ​ធ្វើការពិនិត្យ និង​កែ​តម្រូវ​ឡើង​វិញ​ផងដែរ។ ប្រតិកម្ម​នេះ​កើតឡើង​បន្ទាប់ពី​អត្ថបទ​របស់ Wall Street Journal បាន​ពិពណ៌នា​អំពី​អគារ​ខ្ពស់​មួយ​នៅ​រាជធានី​ភ្នំពេញ​ថា ជា​និមិត្តរូប​នៃ​ប្រាក់ចំណេញ​ពី​បណ្តាញ​ឧក្រិដ្ឋកម្ម​អន​ឡាញ​អន្តរជាតិ ហើយក៏​បានប្រើ​ពាក្យ “Scambodia” លើចំណងជើង ដោយ​អ្នកនយោបាយ​បរទេស​ខ្លះ ដើម្បី​សំដៅលើ​កម្ពុជា ដែល​អាជ្ញាធរ​កម្ពុជា បាន​បដិសេធ​យ៉ាង​ដាច់ខាត​។​

​យោងតាមរបាយការណ៍នៃលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ចាប់ពីខែកក្កដា ឆ្នាំ២០២៥ ដល់ខែពាក់កណ្តាលខែមេសា ឆ្នាំ២០២៦នេះ ពោលគឺក្នុងរយៈពេលជាង៩ខែចុងក្រោយសមត្ថកិច្ចកម្ពុជាក្នុងរាជធានី-ខេត្ត បង្ក្រាបអំពើឆបោកតាមប្រព័ន្ធបច្ចេកវិទ្យា បានចំនួនជាង២៥០ ករណី ក្នុងនោះរាប់បញ្ចូលការបង្រ្កាបទីតាំងកាស៊ីណូចំនួន ៩១ទីតាំង ព្រមទាំងបានកសាងសំណុំរឿង ដើម្បីបញ្ចូនទៅតុលាការចំនួន ១១២ករណី ពាក់ព័ន្ធនឹងជនសង្ស័យ (ជនត្រូវចោទ) ចំនួនប្រមាណ ១ ០៨៩នាក់ មានជនជាតិចិន ថៃ វៀតណាម ជប៉ុន កូរ៉េខាងត្បូង សិង្ហបុរី និងខ្មែរដែរ។

គិតចាប់ពីខែមករា ឆ្នាំ២០២៥ ដល់ថ្ងៃទី១៩ ខែមេសា ឆ្នាំ២០២៦ សមត្ថកិច្ចកម្ពុជាបានអនុវត្តនីតិវិធីបណ្តេញជនបរទេសពាក់ព័ន្ធនឹងការប្រព្រឹត្តការឆបោកអនឡាញ សរុបចំនួន ១៣ ០៣៩នាក់ ក្នុងនោះមានស្ត្រីចំនួន ១ ៥០៩នាក់ មាន ៣៣សញ្ជាតិ៕