វីរៈកងទ័ពជួរ ឈ្មោះ វី រស្មី ជាទាហានដែរ​កំពុង​ឈរជើងការពារ នៅទិសខេត្តព្រះវិហារ បានទទួលសំបុត្រ របស់ ពេជ ចន្ទមុន្នី ហ៊ុនម៉ាណែត ដែលបានសសេរក្នុងយុទ្ធនាការ«១ម៉ឺនក្រមា» ដើម្បីចូលរួមសរសេរសំបុត្រជូនពរ និងដឹងគុណដល់វីរៈកងទ័ពជួរមុខកម្ពុជា។

វីរៈកងទ័ព វី រស្មី បានទទួលសំបុត្ររបស់លោកជំទាវ ពេជ ចន្ទមុន្នី បានលើកឡើងថា៖«​​ជា​សារ​ដ៏​មាន​អត្ថន័យ​​ ​​​​​នឹក​រឭក​ និង​ពាក្យ​ពេចន៍​ជូនពរដល់​ពួក​ខ្ញុំ​ទាំង​អស់​គ្នា​​។ ខ្ញុំអានហើយរំភើប​ ក្តុកក្តួល​ខ្លាំង​ណាស់បងស្រី។ ខ្ញុំសូម​អរគុណ​ និង​សូម​គោរព​ជូនពរ​បង​ស្រី​ និង​សម្តេច​ ព្រម​ទាំង​ក្រុម​គ្រួសារ​ និង​ក្រុមការងារ​ទាំងអស់​ អោយជួបតែ​សុខ​សុវត្ថិភាព​គ្រប់ពេលវេលា និង​ពរ​ទាំង​អស់​បួន​ប្រការ​ អាយុ​ វណ្ណៈ​ សុខៈពលៈ​ ហើយចង់ប្រាប់បងបងថា កុំបារម្មណ៍អី ជួរមុខនឹងការពារបងប្អូន គ្រប់ៗគ្នា»។

ក្រោយបានឃើញវីរៈកងទ័ពផុសទទួលបានសារ លោកជំទាវបណ្ឌិត ពេជ ចន្ទមុន្នី ក៏បានអរគុណវីរៈកងទ័ព វី រស្មី ដោយថា៖«សូមឲ្យប្អូននិងក្រុមការងារប្អូនទាំងអស់ មានសុវត្ថិភាព បងៗនិងប្រជាពលរដ្ឋដែលនៅខាងក្រោយបន្តផ្តល់កំលាំងចិត្តជូនដល់បងប្អូនកងកំលាំងនៅជួរមុខទាំងអស់។ បងជឿជាក់ថាយើងនិងបានជួបគ្នាក្នុងពេលឆាប់ៗខាងមុខនេះ»។

យុទ្ធនាការ "១ម៉ឺនក្រមា និងបណ្ណជូនពរ ដើម្បីវីរកងកម្លាំងជួរមុខ" ជាយុទ្ធនាការនេះរៀបចំឡើងដើម្បីបង្កើតជាវេទិកាជូនសាធារណជន ក្នុងការបង្ហាញនូវក្ដីនឹករលឹក និងការចងចាំជានិច្ចនូវគុណបំណាច់ដ៏ធំធេងរបស់វីរកងកម្លាំងទាំងអស់ ដែលបាននិងហ៊ានលះបង់សាច់ស្រស់ឈាមស្រស់ និងបន្តឈរជើងយ៉ាងរឹងមាំក្នុងបុព្វហេតុការពារជាតិមាតុភូមិដោយអង់អាចក្លាហានបំផុត៕