យ៉ាងហោចណាស់មានមនុស្ស ១០នាក់បានស្លាប់បន្ទាប់ពីទូកដឹកអ្នកដំណើរមួយគ្រឿងបានក្រឡាប់នៅលើទន្លេ Yamuna ក្នុងទីក្រុង Mathura រដ្ឋ Uttar Pradesh ប្រទេសឥណ្ឌា បន្ទាប់ពីបុកជាមួយស្ពានអណ្តែតទឹកនៅថ្ងៃសុក្រ ទី១០ ខែមេសា ឆ្នាំ២០២៦។ ទូកនេះដឹកអ្នកដំណើរប្រហែល ២៥-៣០នាក់មកពីរដ្ឋ Punjabកំពុងធ្វើដំណើរនៅជិតវត្តអារាមសាសនានៅក្នុងតំបន់Vrindavan–Mathura នៅពេលដែលវាបានបុកស្ពានអណ្តែតទឹក ហើយក្រឡាប់។

ប៉ូលិស និងអាជ្ញាធរមូលដ្ឋានបានបញ្ជាក់ថា មានសាកសពចំនួន ១០នាក់ត្រូវបានរកឃើញរហូតមកដល់ពេលនេះ ដោយមានសាកសពជាច្រើននាក់ទៀតនៅតែបាត់ខ្លួន។ ក្រុមជួយសង្គ្រោះបានធ្វើការពេញមួយយប់ដើម្បីស្វែងរកជនរងគ្រោះដែលបាត់ខ្លួន។ អ្នកដំណើរជាង ២០នាក់ត្រូវបានជួយសង្រ្គោះ ហើយបញ្ជូនទៅមន្ទីរពេទ្យក្បែរនោះ ប៉ុន្តែចរន្តទឹកខ្លាំង និងជម្រៅនៃទន្លេ Mathura បានធ្វើឱ្យការស្វែងរកមានការលំបាក។ អាជ្ញាធរបាននិយាយថា ទូកនេះត្រូវបានជួលដោយក្រុមអ្នកកាន់សាសនាមួយក្រុមដែលកំពុងធ្វើដំណើរទស្សនាវត្តអារាម និងទីតាំងមាត់ទន្លេតាមបណ្តោយទន្លេយ៉ាមូណា។​

លោកនាយករដ្ឋមន្ត្រី Narendra Modi ក៏បានសម្តែងការចូលរួមរំលែកទុក្ខរបស់លោកផងដែរ ដោយពិពណ៌នាអំពីការបាត់បង់ជីវិតថាជា ការឈឺចាប់យ៉ាងខ្លាំង និងជំរុញឱ្យអាជ្ញាធរផ្តល់ការគាំទ្រយ៉ាងពេញលេញដល់អ្នករស់រានមានជីវិត។ ជាមួយគ្នានោះ រដ្ឋាភិបាលបានប្រកាសសំណងសម្រាប់សាច់ញាតិរបស់អ្នកដែលបានស្លាប់៕