ក្នុងអំឡុងពេលការចុះពិនិត្យថ្មីៗនេះ ក្រុមការងាររបស់ACCB បានប្រទះឃើញកូនសត្វក្រៀលមួយក្បាល ដែលជាសញ្ញាដ៏មានសង្ឃឹមសម្រាប់អនាគតនៃប្រភេទសត្វក្រៀលនេះ ខណៈកិច្ចខិតខំប្រឹងប្រែងអភិរក្សជាបន្តបន្ទាប់ និងការចុះត្រួតពិនិត្យតាមដានដោយប្រុងប្រយ័ត្នមានសារៈសំខាន់ខ្លាំង។

ជាក់ស្តែង ជារៀងរាល់ឆ្នាំចាប់ពីខែធ្នូដល់ខែឧសភា ក្រុមការងាររបស់ មជ្ឈមណ្ឌលអង្គរសម្រាប់ការអភិរក្សជីវចម្រុះ (ACCB) ចុះធ្វើជំរឿនជាប្រចាំខែ ដើម្បីរាប់ចំនួនសត្វក្រៀល (National Sarus Crane Census) ទូទាំងប្រទេសកម្ពុជា។

ការចុះពិនិត្យជាប្រចាំទាំងនេះជួយក្រុមការងារ ACCB តាមដានចំនួនសត្វក្រៀល តាមពេលវេលា និងយល់កាន់តែច្បាស់ថាតើចំនួនប្រជាសាស្ត្រនៅកម្ពុជាកំពុងងើបឡើងវិញឬយ៉ាងណា។ ការចុះពិនិត្យតាមដានរយៈពេលវែងដូចនេះ គឺជាផ្នែកមួយដ៏សំខាន់នៃការងាររបស់ ACCB ដើម្បីគាំទ្រដល់ការអភិរក្សប្រភេទសត្វដ៏សំខាន់នេះ។

គួរបញ្ជាក់ផងដែរថា ACCB គឺជាសមាជិកនៃក្រុមការងារអភិរក្សសត្វក្រៀលកម្ពុជា (CSCWG) ដែលរួមចំណែកដល់កិច្ចខិតខំប្រឹងប្រែងជាតិ ដើម្បីពិនិត្យតាមដាន និងអភិរក្សចំនួនប្រជាសាស្ត្រសត្វក្រៀល នៅកម្ពុជាផងដែរ៕