ប្រធានាធិបតីអាម៉េរិក លោក Donald Trump បាននិយាយកាលពីថ្ងៃសៅរ៍ (ថ្ងៃទី៤ ខែមេសា) ថា ទីក្រុងតេអេរ៉ង់មានរយៈពេល ៤៨ ម៉ោងទៀតដើម្បីឈានដល់កិច្ចព្រមព្រៀង ឬប្រឈមមុខនឹងការបំផ្លាញទាំងស្រុង ។ ច្រកសមុទ្រHormuz គឺជាផ្លូវសមុទ្រតូចចង្អៀតមួយដែលប្រទេសជាច្រើនប្រើប្រាស់សម្រាប់ដឹកជញ្ជូនប្រេង និងទំនិញ។ លោក Trump បានសរសេរនៅលើ Truth Social ថា ប្រសិនបើអ៊ីរ៉ង់មិនបើកច្រកសមុទ្រHormuz ឡើងវិញ ឬយល់ព្រមលើកិច្ចព្រមព្រៀងនយោបាយក្នុងរយៈពេលពីរថ្ងៃទេ សហរដ្ឋអាមេរិកនឹងចាប់ផ្តើមសកម្មភាពយោធាយ៉ាងខ្លាំងប្រឆាំងនឹងទីក្រុងតេអេរ៉ង់។

សារនេះត្រូវបានគេមើលឃើញយ៉ាងទូលំទូលាយថា ជាការគំរាមកំហែងចុងក្រោយនៃការវាយប្រហារទ្រង់ទ្រាយធំលើទីតាំងថាមពល ហេដ្ឋារចនាសម្ព័ន្ធ ឬគោលដៅយោធារបស់អ៊ីរ៉ង់ ប្រសិនបើទីក្រុងតេអេរ៉ង់បដិសេធមិនចរចា។

អ៊ីរ៉ង់បានបដិសេធឱសានវាទនេះ ដោយមន្ត្រីអ៊ីរ៉ង់បានព្រមានថា ការវាយប្រហារណាមួយរបស់សហរដ្ឋអាមេរិកអាចនាំឱ្យមានសង្គ្រាមកាន់តែធំ។ មេដឹកនាំអ៊ីរ៉ង់អះអាងថា ពួកគេនឹងមិនចុះចាញ់នឹងសម្ពាធនោះទេ។ ក្នុងពេលជាមួយគ្នានេះ ប្រទេសជាច្រើនកំពុងព្យាយាមសម្របសម្រួលភាគីទាំងពីរឱ្យពិភាក្សា និងជៀសវាងការប្រយុទ្ធគ្នាបន្ថែមទៀត។ នៅពេលដែលរយៈពេល ៤៨ ម៉ោងកំពុងរាប់ថយក្រោយ មនុស្សជាច្រើននៅជុំវិញពិភពលោកកំពុងតាមដានយ៉ាងដិតដល់ ដើម្បីមើលថាតើប្រទេសទាំងពីរឈានដល់កិច្ចព្រមព្រៀង ឬធ្លាក់ចូលទៅក្នុងសង្គ្រាមជាថ្មី៕