ប្រធានគណៈកម្មការទី៤ នៃរដ្ឋសភា បានជំរុញឲ្យកងកម្លាំងមានសមត្ថកិច្ច បន្តរឹតបន្តឹង និងអនុវត្តវិធានការយ៉ាងតឹងរ៉ឹងក្នុងការបង្ក្រាបបទល្មើសគ្រឿងញៀន លុបបំបាត់ល្បែងស៊ីសងគ្រប់ប្រភេទ និងទប់ស្កាត់ក្រុមក្មេងទំនើង មិនឲ្យបង្កអសន្តិសុខក្នុងមូលដ្ឋាន។

នេះបើតាមការលើកឡើងរបស់ ឯកឧត្តម កែប ជុតិមា តំណាងរាស្ត្រមណ្ឌលរាជធានីភ្នំពេញ និងជាប្រធានគណៈកម្មការទី៤ នៃរដ្ឋសភា ក្នុងពិធីសំណេះសំណាលជាមួយអាជ្ញាធរពាក់ព័ន្ធ សមាជិកក្រុមប្រឹក្សាសង្កាត់ កងកម្លាំងប៉ូលីស កងរាជអាវុធហត្ថ និងប្រជាការពារ ក្នុងខណ្ឌដង្កោ រាជធានីភ្នំពេញ។

ជាមួយគ្នានេះ ឯកឧត្តម កែប ជុតិមា បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់អាជ្ញាធរ និងកងកម្លាំងទាំងអស់ ក្នុងការបំពេញភារកិច្ចបម្រើប្រជាពលរដ្ឋ។ ជាពិសេស ឯកឧត្តម បានផ្តោតសំខាន់លើបញ្ហាបទល្មើសឆបោកតាមអនឡាញ (Online scams) ដែលកំពុងកើតមាន និងប៉ះពាល់ដល់ប្រជាពលរដ្ឋ ដោយបានអំពាវនាវឲ្យមានវិធានការកាត់បន្ថយ និងទប់ស្កាត់ឲ្យបានទាន់ពេលវេលា ដើម្បីការពារទ្រព្យសម្បត្តិ និងផលប្រយោជន៍របស់ប្រជាពលរដ្ឋផងដែរ៕