លោកនាយករដ្ឋមន្ត្រី អាន់វ៉ា អ៊ីប្រាហ៊ីម បានមានប្រសាសន៍ថា ប្រទេសម៉ាឡេស៊ីនឹងដាក់ចេញនូវគោលនយោបាយធ្វើការពីផ្ទះសម្រាប់មន្ត្រីរាជការចាប់ពីថ្ងៃទី ១៥ ខែមេសា ឆ្នាំ ២០២៦តទៅ ដើម្បីសន្សំសំចៃថាមពលក្នុងអំឡុងពេលសង្គ្រាមមជ្ឈិមបូព៌ា។

ការប្រកាសរបស់នាយករដ្ឋមន្ត្រីនៅយប់ថ្ងៃពុធ (ថ្ងៃទី ០១ ខែមេសា) បានកើតឡើងនៅពេលដែលប្រទេសអាស៊ីអាគ្នេយ៍នេះចាប់ផ្តើមរងផលប៉ះពាល់ពីសង្គ្រាមមជ្ឈិមបូព៌ាលើការផ្គត់ផ្គង់ប្រេងឥន្ធនៈសកល។ លោក អាន់វ៉ា បានថ្លែងក្នុងអំឡុងពេលសន្និសីទពិសេសមួយថា គណៈរដ្ឋមន្ត្រីបានយល់ព្រមលើគោលនយោបាយធ្វើការពីផ្ទះ ដែលវិធានការនេះមានគោលបំណងកាត់បន្ថយការប្រើប្រាស់ប្រេងឥន្ធនៈ និងធានាបាននូវការផ្គត់ផ្គង់ថាមពលដែលមានស្ថេរភាព។

ក្នុងពេលជាមួយគ្នានេះ រដ្ឋាភិបាលបានកាត់បន្ថយចំនួនទឹកប្រាក់ឧបត្ថម្ភធនសម្រាប់ប្រេងសាំង RON95 ដែលមនុស្សម្នាក់ៗអាចទិញបានក្នុងមួយខែៗ ដោយសារតែតម្លៃប្រេងឆៅសកលកើនឡើងខ្ពស់ ហើយអ៊ីរ៉ង់បានបិទច្រកសមុទ្រHormuz ដែលជាផ្លូវឆ្លងកាត់ដ៏សំខាន់។ លោក អាន់វ៉ា បាននិយាយថា កូតាសម្រាប់ប្រេងឥន្ធនៈឧបត្ថម្ភធននឹងត្រូវកាត់បន្ថយពី ៣០០ លីត្រមកត្រឹម ២០០ លីត្រក្នុងមួយខែ៕