លោក Valéry Freland នាយកប្រតិបត្តិ អង្គការ ALIPH បានចុះពិនិត្យលទ្ធផលការងារគម្រោងអភិរក្ស និងជួសជុលប្រាសាទក្រហម នៅរមណីយដ្ឋានប្រាសាទកោះកេរ។

នាថ្ងៃទី២០ ខែមីនា ឆ្នាំ២០២៦ ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ រួមជាមួយថ្នាក់ដឹកនាំ និងមន្រ្តីជំនាញ បានទទួលស្វាគមន៍លោក Valéry Freland នាយកប្រតិបត្តិអង្គការ សម្ព័ន្ធអន្តរជាតិដើម្បីការពារបេតិកភណ្ឌ (International Alliance for the Protection of Heritage – ALIPH) នៃប្រទេសស្វីស និងគណៈប្រតិភូ ក្នុងឱកាសចុះពិនិត្យលទ្ធផលការងារគម្រោងអភិរក្ស និងជួសជុលប្រាសាទក្រហម ស្ថិតនៅបរិវេណប្រាសាទធំក្នុងរមណីយដ្ឋានប្រាសាទកោះកេរ ដែលទទួលបានការគាំទ្រថវិកាពីអង្គការ ALIPH។

ក្នុងឱកាសនោះ មន្រ្តីជំនាញបានធ្វើបទបង្ហាញអំពីវឌ្ឍនភាពការងារ និងបានពិភាក្សាអំពីទិសដៅអនុវត្តការងារអភិរក្ស និងជួសជុលបន្ត។ ជាមួយគ្នានោះលោក Valéry Freland បានសម្ដែងការកោតសរសើរចំពោះក្រុមការងារគម្រោង ដែលបានខិតខំប្រឹងប្រែង និងយកចិត្តទុកដាក់ខ្ពស់ ក្នុងការអនុវត្តការងារនេះ និងលើកទឹកចិត្តដល់ក្រុមការងារបន្តខិតខំបន្ថែមទៀតដើម្បឲ្យការងារកាន់តែល្អប្រសើរ។

គម្រោងអភិរក្ស និជួសជុលខាងលើមានរយៈពេល៣ឆ្នាំ ចាប់ឆ្នាំ២០២៥ រហូតដល់ឆ្នាំ២០២៧។​ អាជ្ញាធរជាតិព្រះវិហារ សូមថ្លែងអំណរគុណដល់អង្គការ ALIPH ចំពោះការគាំទ្រផ្នែកថវិកា និងបច្ចេកទេសលើកិច្ចការអភិរក្ស និងជួសជុលប្រាសាទ ដើម្បីរួមចំណែករក្សាទុកកេរមត៌កវប្បធម៌សម្រាប់អ្នកជំនាន់ក្រោយ។