«មហោស្រពសិល្បៈតាមដងផ្លូវអន្តរជាតិ កម្ពុជា-ចិន» ដើម្បីអបអរសាទរឆ្នាំទេសចរណ៍ កម្ពុជា-ចិន ២០២៦ រៀបចំដោយក្រសួងទេសចរណ៍ និងស្ថានទូតចិនប្រចាំកម្ពុជា ទទួលបានការគាំទ្រពីភ្ញៀវទេសចរជាតិ និងអន្តរជាតិដ៏ច្រើនសន្ធឹកសន្ធាប់។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ បានអញ្ជើញជាអធិបតីក្នុងព្រឹត្តិការណ៍ «មហោស្រពសិល្បៈតាមដងផ្លូវអន្តរជាតិ កម្ពុជា-ចិន» ដោយមានការអញ្ជើញចូលរួមពីឯកឧត្តម ង៉ូវ សេងកាក់ តំណាងឯកឧត្តមអភិបាលនៃគណៈអភិបាលខេត្តសៀមរាប ឯកឧត្តម-លោកជំទាវរដ្ឋលេខាធិការ និងអនុរដ្ឋលេខាធិការតំណាងក្រសួង និងស្ថាប័ននានា មន្ត្រីរាជការសាលាខេត្តសៀមរាប សហភាពសហព័ន្ធយុវជនកម្ពុជា សិស្ស-និស្សិត និងភ្ញៀវទេសចរជាតិ និងអន្តរជាតិប្រមាណជាង៣,០០០នាក់ ដែលបានរៀបចំឡើងយ៉ាងអធិកអធមនៅតំបន់ថ្មើរជើងផាប់ស្ទ្រីត (Pub Street) ខេត្តសៀមរាប។

ក្នុងឱកាសនេះ ឯកឧត្តម ង៉ូវ សេងកាក់ បានជម្រាបជូនអង្គពិធីពីការអភិវឌ្ឍទេសចរណ៍របស់ខេត្ត តាមការអភិវឌ្ឍទេសចណ៍បទពិសោធន៍ ដែលជាផលិតផលទេសចរណ៍ផ្តល់នូវបទពិសោធន៍ដ៏សម្បូរបែបដល់ភ្ញៀវទេសចរជាតិ និងអន្តរជាតិចូលរួម និងសាកល្បងផ្ទាល់ជាមួយវប្បធម៌ ប្រពៃណីទំនៀមទំលាប់ សិល្បៈ ម្ហូបអាហារ ការកម្សាន្តគោលដៅទេសចរណ៍បេតិកភណ្ឌប្រវត្តិសាស្រ្ត ធម្មជាតិដែលប្រទេសកម្ពុជាមានជាពិសេសគឺនៅខេត្តសៀមរាបតែម្តង ដូចជាព្រឹត្តិការណ៍សិល្បៈវប្បធម៌នាល្ងាចនេះជាសក្ខីភាពស្រាប់។

ថ្លែងក្នុងពិធីនេះ ឯកឧត្តមរដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅចំពោះមិត្តចិន ដែលតែងតែគាំទ្ររាល់ព្រឹត្តិការណ៍ និងកម្មវិធីជំរុញទេសចរណ៍នានារហូតមក ជាពិសេសការគំាទ្រក្នុងយុទ្ធនាការ «ឆ្នាំទេសចរណ៍ កម្ពុជា-ចិន» ដែលជាព្រឹត្តិការណ៍ដ៏សំខាន់ក្នុងការជំរុញកំណើនភ្ញៀវទេសចររវាងប្រទេសមិត្តទាំងពីរ និងពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រៅ។

គួរបញ្ជាក់ផងដែរថា ក្នុងឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិប្រមាណ ៥,៦ លាននាក់ ក្នុងនោះភ្ញៀវទេសចរចិនមានចំនួនជាង ១,២ លាននាក់ កើនឡើងជិត ៤២% ហើយស្ថិតក្នុងលំដាប់ទី២ នៃទីផ្សារទេសចរអន្តរជាតិមកកម្ពុជា។ ចំណែកក្នុងរយៈពេល២ខែដើមឆ្នាំ២០២៦ កម្ពុជាទទួលបានភ្ញៀវទេសចរអន្តរជាតិប្រមាណ ៧០០.០០០ នាក់ ក្នុងនោះមានភ្ញៀវទេសចរចិនកើនប្រមាណ១៥ម៉ឺននាក់។

សូមជម្រាបជូនថាចាប់ពីថ្ងៃទី១៥ ខែមិថុនា រហូតដល់ថ្ងៃទី១៥ ខែតុលា ឆ្នាំ២០២៦ ខាងមុខនេះ សម្រាប់ភ្ញៀវទេសចរចិនដែលមានលិខិតឆ្លងដែនចិន អាចធ្វើដំណើរចេញចូលប្រទេសកម្ពុជាដោយពុំចាំបាច់មានទិដ្ឋាការ (Visa Free) ឡើយ៕