អគ្គិភ័យដ៏ធំមួយបានឆាបឆេះនៅរោងចក្រគ្រឿងបន្លាស់រថយន្តមួយក្នុងប្រទេសកូរ៉េខាងត្បូងនៅថ្ងៃសុក្រ ទី ២០ ខែមីនា ឆ្នាំ​២០២៦ ដោយបានធ្វើឱ្យមនុស្សយ៉ាងហោចណាស់ ៥៥ នាក់រងរបួស។ អគ្គិភ័យនេះបានកើតឡើងនៅរោងចក្រគ្រឿងបន្លាស់រថយន្តមួយក្នុងទីក្រុងដេជុន ចម្ងាយប្រហែល ១៤០ គីឡូម៉ែត្រភាគខាងត្បូងនៃទីក្រុងសេអ៊ូល បង្កឲ្យមានផ្សែងខ្មៅក្រាស់ពេញមេឃ។ កម្មករជាច្រើននៅខាងក្នុងអគារនៅពេលដែលអគ្គិភ័យបានចាប់ផ្តើមឆាបឆេះ ហើយក្រុមសង្គ្រោះបន្ទាន់បានប្រញាប់ប្រញាល់ទៅកាន់កន្លែងកើតហេតុ។កម្មករមួយចំនួនបានរងរបួសនៅពេលដែលពួកគេលោតចេញពីបង្អួចដើម្បីគេចពីផ្សែង និងកំដៅ ខណៈពេលដែលអ្នកផ្សេងទៀតបានរងរបួសដោយសារស្រូបផ្សែង។ អ្នករងរបួសប្រហែល ២៤នាក់ស្ថិតក្នុងស្ថានភាពធ្ងន់ធ្ងរ ហើយកម្មករជាច្រើននាក់នៅតែបាត់ខ្លួន ដូច្នេះចំនួនជនរងគ្រោះអាចកើនឡើង ខណៈពេលដែលអ្នកជួយសង្គ្រោះកំពុងរុករកក្នុងអគារដែលខូចខាត។

អ្នកពន្លត់អគ្គិភ័យ ប៉ូលិស និងបុគ្គលិកសង្គ្រោះបន្ទាន់ជាង ៥០០ នាក់ត្រូវបានដាក់ពង្រាយ រួមជាមួយយានយន្តប្រហែល ១២០ គ្រឿង យន្តហោះជម្លៀស និងឧបករណ៍ រួមទាំងរថយន្តបាញ់ទឹកគ្មានមនុស្សបើក និងមនុស្សយន្តពន្លត់អគ្គិភ័យពីរគ្រឿង ដែលប្រើប្រាស់នៅក្នុងតំបន់ដែលក្រុមអ្នកជួយសង្គ្រោះទៅមិនដល់ ។ រដ្ឋាភិបាលបានសន្យាថានឹងជួយអ្នករងរបួស និងក្រុមគ្រួសាររបស់ពួកគេ និងបានអំពាវនាវឱ្យមានការចល័តបុគ្គលិក និងឧបករណ៍ពេញលេញ ដើម្បីទប់ស្កាត់អគ្គិភ័យ និងគាំទ្រប្រតិបត្តិការជួយសង្គ្រោះ៕