ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បង្ហាញក្ដីរន្ធត់ និងសោកស្តាយជាពន់ពេក ខណៈកុមារចំនួន​២នាក់ ត្រូវបានបាត់បង់ជីវិតដោយសារសំណល់យុទ្ធភណ្ឌមិនទាន់ផ្ទុះ នៅស្រុកសន្ទុក ខេត្តកំពង់ធំ កាលពីល្ងាចនៅថ្ងៃទី១៤​ ខែមីនា ឆ្នាំ២០២៦។

នេះបើយោងតាមសំណេររបស់ ឯកឧត្តម ហេង រតនា បានបញ្ជាក់បែបនេះថា៖ «ខ្ញុំពិតជារន្ធត់និងសោកស្តាយណាស់ដែលកុមារចំនួន​២នាក់បានបាត់បង់ជីវិតដោយសារសំណល់យុទ្ធភណ្ឌមិនទាន់ផ្ទុះ កាលពីល្ងាចនៅថ្ងៃទី១៤​ ខែមីនា ឆ្នាំ២០២៦ នៅភូមិកំពង់ថ្ម ឃុំកំពង់ថ្ម ស្រុកសន្ទុក ខេត្តកំពង់ធំ! ការផ្ទុះគ្រាប់ប្រភេទ M79 (M381) សំណល់យុទ្ធភណ្ឌសង្គ្រាម​នេះ បណ្តាលឱ្យកុមារាអាយុ០៨ឆ្នាំម្នាក់​ និងកុមារីអាយុ១៤ឆ្នាំម្នាក់រងរបួសរហូតដល់ស្លាប់។ នេះជាទុក្ខសោកនាដកម្មដោយសារសំណល់គ្រាប់មិនទាន់ផ្ទុះនៃសង្គ្រាម​ វាអាចមានអាយុកាលជាង៣០-៤០ឆ្នាំទៅហេីយ​ ប៉ុន្តែនៅតែបន្តបំផ្លិចបំផ្លាញនិងបង្ករងគ្រោះដល់មនុស្សជំនាន់ក្រោយៗទៀត!»។

​ឯកឧត្តមបានបន្តថា៖ «សូមបួងសួងវត្ថុសក្តិសិទ្ធក្នុងលោក​ សូមជួយពាំនាំវិញ្ញាណខន្តកុមារទាំង២បានទៅកាន់ឋានសុគតិភពកុំឃ្លៀងឃ្លាតឡេីយ!៕