សហរដ្ឋអាមេរិកបានធ្វើការវាយប្រហារតាមអាកាសលើទីតាំងយោធានៅទូទាំងកោះ Kharg របស់អ៊ីរ៉ង់នៅថ្ងៃទី ១៤ ខែមីនា ឆ្នាំ២០២៦។ ប្រធានាធិបតី Donald Trump បានប្រកាសពីប្រតិបត្តិការលើ Truth Social ដោយហៅវាថាជាយុទ្ធនាការទម្លាក់គ្រាប់បែកដ៏មានឥទ្ធិពលបំផុតមួយក្នុងប្រវត្តិសាស្ត្រមជ្ឈិមបូព៌ា និងព្រមានថាទីតាំងប្រេងសំខាន់ៗរបស់តំបន់នេះអាចជាគោលដៅបន្ទាប់ ប្រសិនបើអ៊ីរ៉ង់បន្តជ្រៀតជ្រែកជាមួយការឆ្លងច្រកសមុទ្រ Hormuz។

លោក Trump បានអះអាងថា កងកម្លាំងអាម៉េរិកបានបំផ្លាញទាំងស្រុងលើគោលដៅយោធាទាំងអស់ រួមទាំងការការពារដែនអាកាស និងរោងចក្រកងទ័ពជើងទឹក ជាមួយនឹងការផ្ទុះជាង ១៥ ដងដែលបានរាយការណ៍ដោយប្រភពអ៊ីរ៉ង់។ កោះ Kharg គឺជាទីតាំងដែលប្រេងរបស់អ៊ីរ៉ង់ជាង ៩០%ត្រូវបាននាំចេញ។ តម្លៃប្រេងឆៅបានកើនឡើងជាង ៤០%ចាប់តាំងពីសង្គ្រាមបានចាប់ផ្តើម។ នេះ​គឺជា​ថ្ងៃទី ១៥ នៃសង្គ្រាម​រវាង​សហរដ្ឋអាមេរិក និងអ៊ីស្រាអែល​លើអ៊ីរ៉ង់ បន្ទាប់ពីការវាយប្រហារ​ដែលបានសម្លាប់មេដឹកនាំកំពូលរបស់ខ្លួន​នៅថ្ងៃទី ២៨ ខែកុម្ភៈ។

លោក  Trump បាននិយាយថា លោកមានចេតនាទុកកន្លែងផលិតប្រេងរបស់អ៊ីរ៉ង់នៅលើកោះ Kharg ក្នុងអំឡុងពេលនៃការវាយប្រហារថ្មីៗនេះ ដោយផ្អាកការបំផ្លិចបំផ្លាញទាំងស្រុងមួយរយៈ។ ទោះជាយ៉ាងណាក៏ដោយ លោក Trump ព្រមានថា ប្រសិនបើអ៊ីរ៉ង់នៅតែបន្តបិទច្រកសមុទ្រ Hormuz ដែលជាផ្លូវប្រេងសកលដ៏សំខាន់មួយ លោកនឹងប្តូរទិសដៅ ហើយកំណត់គោលដៅទីតាំងប្រេងទាំងនោះភ្លាមៗ៕