តារាចម្រៀង រ៉ន ចាន់ឌីន អតីតបេក្ខភាពប្រលងចម្រៀងកុមារលំដាប់ពិភពលោក The Voice Kids Cambodia រដូវកាលទី ១ បានបង្ហោះសំណេរមួយរៀបរាប់ពីបញ្ហាដែលបានជួបប្រទះនូវរឿងនឹកស្មានមិនដល់ ព្រមទាំងទាមទាររកយុត្តិធម៌ ខណៈប្អូនប្រុសជាទីស្រលាញ់អាយុទើបតែ 5ឆ្នាំ រៀនថ្នាក់មតេ្តយ្យត្រូវបានក្មេងៗដទៃព្រួតគ្នាវាយធ្វើបាបរងរបួសពេញខ្លួន ដល់ថ្នាក់ប៉ះពាល់អារម្មណ៍លែងហ៊ានទៅសាលារៀន។

ដោយក្នុងសំណេររបស់ តារាចម្រៀង រ៉ន ចាន់ឌីន បានរៀបរាប់កាលពីថ្ងៃទី០៩ ខែមីនា នេះថា៖ «ក្មេង6/7ឆ្នាំ ចិត្តសាហាវព្រៃផ្សៃ ព្រួតគ្នាវាយក្មេងអាយុ5ឆ្នាំនៅសាលារៀន ថ្នាក់មតេយ្យ ត្រឹមជាកូនសិស្សផ្ញេីរ 2/3នាក់ព្រួតវាយគ្នាម្នាក់ចាប់ដៃទៅក្រោយដូចអ្នកទោស គ្រាន់ឮដំណឹង ភ្លាម ខ្លោចចិត្តចង់ប្រេះទ្រូងហេីយមិនមែនម្តងទេលេីកទីមួយចង់បាក់ខ្ទង់ច្រមុះ មកលេីកនេះព្រួតគ្នារបួសពេញខ្លួន ក្មេងមានចិត្តសាហាវបែបនេះជាកំហុសអ្នកណា ជួយរកយុត្តិធម៍អោយប្អូនខ្ញុំផង គ្នាតក់ស្លុតខ្លាចលែងហ៊ានទៅសាលាហេីយ​»។

សូមបញ្ជាក់ផងដែរថា ជុំវិញនៅរឿងរ៉ាវនេះ តារាចម្រៀង រ៉ន ចាន់ឌីន នៅមិនទាន់បញ្ជាក់ថាជាសាលារៀនមានឈ្មោះអ្វីនោះទេ ខណៈអាណាព្យាបាលផ្សេងៗទៀតកំពុងមានការព្រួយបារម្ភចំពោះកូនតូចៗដែលនៅសិក្សាតាមបណ្ដាសាលាផ្សេងៗផងដែរ៕ អត្ថបទដោយ៖ Sun Darasy