បណ្ដាអ្នកគាំទ្របានសម្ដែងអារម្មណ៍រំភើប និងចូលរួមអបអរសាទរ ខណៈបានឃើញអ្នកផលិតមាតិកាចម្អិនម្ហូបបែបជនបទដ៏ល្បី កញ្ញា ឆោម ស្រីផាច បានប្រកាសនៅដំណឹងល្អ ដោយកញ្ញានឹងរៀបចំពិធីចំនួន៣ ក្នុងថ្ងៃតែមួយ ក្នុងនោះមានដូចជា ពិធីភ្ជាប់ពាក្យ ឡើងគេហដ្ឋានថ្មី ព្រមទាំងសម្ពោធហាងកាហ្វេ។

យ៉ាងណាមិញ តាមរយៈរូបភាពដែល អ្នកផលិតមាតិការូបនេះ បានចែកចាយក្នុងបណ្ដាញសង្គមធ្វើឲ្យមហាជនផ្ទុះការចាប់អារម្មណ៍ខ្លាំង ស្ញប់ស្ញែងចំពោះរូបនាងដែលខិតខំតស៊ូព្យាយាមរហូតមានឈ្មោះបោះសម្លេង សម្រេចគោលដៅបានជាបន្តបន្ទាប់ ដែលនេះជាជំហានថ្មីក្នុងជីវិតសម្រាប់ដើមឆ្នាំ ២០២៦នេះ។

សូមបញ្ជាក់ផងដែរថា កញ្ញា ឆោម ស្រីផាច ជាបុគ្គលល្បីមួយរូបក្នុងបណ្ដាញសង្គមដែលមានប្រភពមកពីខេត្តបន្ទាយមានជ័យ ដោយមហាជនជាច្រើនគោរពស្រលាញ់ និងគាំទ្រ ដោយសារមាតិកាចម្អិនម្ហូបនីមួយៗមានច្នៃប្រឌិតខ្ពស់ ចំពោះការថតរំលេចទៅដោយធម្មជាតិតាមជនបទ មើលទៅហាក់ស្រស់ស្រាយ ព្រមទាំងគួបផ្សំជាមួយការបញ្ជូលសម្លេងទៀតកាន់តែទាក់ទាញ់មួយកម្រិតទៀត ហើយអ្វីដែលកាន់ពិសេសនឹងធ្វើឲ្យមហាជនស្ញប់ស្ញែងនោះគឺគ្រប់ពេលដែលចម្អិនម្ហូប កញ្ញា ឆោម ស្រីផាច តែងតែយកទៅចែកជូនដល់កុមារតូចៗ អ្នកខ្វះខាត នៅតាមស្រុកភូមិផ្សេងៗ ដែលត្រង់ចំណុចទាំងនេះហើយទើបធ្វើឲ្យគ្រប់គ្នាកាន់តែស្រលាញ់ពេញចិត្តផងដែរ៕ អត្ថបទដោយ៖ Sun Darasy