ប្រធានាធិបតីអាម៉េរិក លោក Donald Trump បានព្រមាននៅថ្ងៃច័ន្ទ ទី០២ ខែមីនាថា ការវាយប្រហាររបស់លោកទៅលើអ៊ីរ៉ង់អាចអូសបន្លាយពេលយូរជាងមួយខែ ខណៈដែលសង្គ្រាមបានរីករាលដាលពាសពេញមជ្ឈិមបូព៌ា បន្ទាប់ពីការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែលថ្មីៗនេះ។

ភាពតានតឹងបានផ្ទុះឡើងនៅថ្ងៃទី ២៨ ខែកុម្ភៈ ឆ្នាំ ២០២៦ នៅពេលដែលកងកម្លាំងសហរដ្ឋអាមេរិក និងអ៊ីស្រាអែលបានវាយប្រហារគោលដៅថ្នាក់ដឹកនាំអ៊ីរ៉ង់ ហើយអ៊ីរ៉ង់បានសងសឹកដោយបាញ់មីស៊ីលទៅលើរដ្ឋឈូងសមុទ្រដែលមានមូលដ្ឋានអាម៉េរិក រួមមានកាតា គុយវ៉ែត បារ៉ែន អារ៉ាប់រួម អារ៉ាប៊ីសាអូឌីត និងអូម៉ង់។ អ៊ីរ៉ង់បានឆ្លើយតបដោយការបិទច្រកសមុទ្រ Hormuz ដែលជាផ្លូវទឹកដ៏សំខាន់សម្រាប់ប្រេង២០%នៃពិភពលោក និងសន្យាថានឹងវាយប្រហារកប៉ាល់ណាមួយដែលព្យាយាមឆ្លងកាត់។

ថ្លែងពីសេតវិមានលោក Trump បានប្រកាសថា សង្គ្រាមប្រឆាំងនឹងអ៊ីរ៉ង់អាចមានរយៈពេលយូរ ដោយសង្កត់ធ្ងន់លើការបំផ្លាញកម្មវិធីមីស៊ីល កងទ័ពជើងទឹក និងនុយក្លេអ៊ែររបស់អ៊ីរ៉ង់ និងបញ្ឈប់ការគាំទ្ររបស់ខ្លួនចំពោះក្រុមប្រដាប់អាវុធនៅទូទាំងតំបន់ ដោយមិនរាប់បញ្ចូលការផ្តួលរំលំសាធារណរដ្ឋអ៊ីស្លាមនោះទេ៕