លោកស្រី សុភា បុត្រឈរ (Sophea Böttcher)បានបង្ហោះសំណេរប្រកាសច្បាស់ៗទៅកាន់បុគ្គលមួយចំនួនដែលតែងតែរំខានជីវិតឯកជនតាមរយៈការផ្ញើរសារ ឬស្នើសុំតាមគណនីធនាគារដើម្បីទាមទារសុំជំនួយ ដោយក្នុងនោះលោកស្រីក៏បានបញ្ជាក់ថា នឹងកក់ត្រាឈ្មោះទុក ហើយថែមទាំងមិនផ្ដល់ជំនួយដល់បុគ្គលនោះឡើយ។

នេះបើយោងតាមសំណេររបស់ លោកស្រី សុភា បុត្រឈរ (Sophea Böttcher)បានរៀបរាប់បែបនេះថា៖ «ខ្ញុំសូមអភ័យទោសជាមុន និងសូមជម្រាបជូនជាផ្លូវការថា ចាប់ពីពេលនេះតទៅ អ្នកណាដែលផ្ញើសារ ស្នើសុំប្រាក់ ឬព្យាយាមទាក់ទងខ្ញុំតាមរយៈ គណនីធនាគារផ្ទាល់ខ្លួន របស់ខ្ញុំ នឹង មិនទទួលបានការឆ្លើយតប ការឧបត្ថម្ភ ឬការផ្តល់អំណោយណាមួយពីខ្ញុំទៀតឡើយ។

ខ្ញុំបានជូនដំណឹងជាច្បាស់រួចហើយពីមុនថា ខ្ញុំ មិនទទួលសារ មិនទទួលសំណើ និងមិនអនុញ្ញាតឲ្យប្រើគណនីធនាគារផ្ទាល់ខ្លួនរបស់ខ្ញុំ សម្រាប់ការស្នើសុំ ឬការទាក់ទងអំពីការបរិច្ចាគ ទេ។ ដូច្នេះ ខ្ញុំបានបិទ និងលុបជម្រើសទាំងអស់ដែលពាក់ព័ន្ធនឹងការទាក់ទងតាមវិធីនេះ។

លោកស្រីបានបន្តថា៖ «ចាប់ពីពេលនេះតទៅ ប្រសិនបើនៅមានអ្នកបន្តផ្ញើសារ ឬស្នើសុំតាមគណនីធនាគាររបស់ខ្ញុំ ខ្ញុំនឹងកត់ត្រាឈ្មោះទុកជាឯកសារ ហើយរាល់សារទាំងនោះ នឹងត្រូវចាត់ទុកថា មិនមានការទទួលស្គាល់ និងមិនមានការឆ្លើយតបពីខ្ញុំឡើយ។

បងប្អូនមានពេលវេលា និងឱកាសគ្រប់គ្រាន់ក្នុងការទាក់ទងតាមរយៈ Facebook ទាំងពីរគណនីរបស់ខ្ញុំ ឬតាម ក្រុម (Group) ដែលខ្ញុំធ្វើការជាមួយ ដែលត្រូវបានរៀបចំឡើងសម្រាប់ការទំនាក់ទំនង និងការជួយគ្នាតាមរបៀបត្រឹមត្រូវ និងមានការគ្រប់គ្រង។

សូមមេត្តាគោរពការសម្រេចចិត្ត ភាពឯកជន និងគណនីផ្ទាល់ខ្លួនរបស់ខ្ញុំ។ សូមកុំផ្ញើសារ ឬទាក់ទងមកខ្ញុំតាមរយៈគណនីធនាគារផ្ទាល់ខ្លួននេះទៀត»៕