ការឈ្លានពានមកលើទឹកដីកម្ពុជាទាំងកំរោល ដោយបានទម្លាក់គ្រប់បែក បាញ់ផ្លោង និងបាញ់ផ្សែងពុលចូលមកក្នុងដែនអធិបតេយ្យកម្ពុជា ត្រូវបានមើលឃើញថាផ្ទុយនឹងច្បាប់អន្តរជាតិ ថែមទាំងបានបំផ្លិចបំផ្លាញធនធានធម្មជាតិ ដែលចាត់ទុបានថាជាអំពើ«ឧក្រិដ្ឋកម្មបរិស្ថាន»។ 

រដ្ឋមន្រ្តីក្រសួងបរិស្ថាន ឯកឧត្តមបណ្ឌិត អ៊ាង សុផល្លែត បានលើកឡើងនៅថ្ងៃទី២៣ ខែធ្នូ ឆ្នាំ២០២៥ ក្នុងការអញ្ជើញធ្វើបាឋកថា ស្តីពី«ការដឹកនាំនិងគ្រប់គ្រងវិស័យបរិស្ថាននៅកម្ពុជា» នៅរាជបណ្ឌិតសភាកម្ពុជា ដោយមានការចូលរួមពីថ្នាក់ដឹកនាំ សាស្រ្តាចារ្យ សិស្ស និស្សិត នៃរាជបណ្ឌិតសភាកម្ពុជា សាលាភូមិន្ទរដ្ឋបាល សហភាសហព័ន្ធយុវជនកម្ពុជា និងយុវជនកម្ពុជាជាច្រើនផ្សេងទៀត។ 

ឯកឧត្តមបណ្ឌិត អ៊ាង សុផល្លែត បានថ្លែងថាទង្វើឈ្លានពាន មិនត្រឹមតែបង្កឱ្យមនុស្សស្លាប់ និងរបួស ថែមទាំងបំផ្លិចបំផ្លាញធនធានធម្មជាតិ ជីវៈចម្រុះក្នុងដែនអធិបតេយ្យរបស់កម្ពុជា និងបានរំលោភច្បាប់អន្តរជាតិ រំលោភសិទ្ធិមនុស្ស។ « បរិស្ថានជាជីវិត មិនគោរពបរិស្ថាន គឺមិនគោរពជីវិត។ មិនគោរពជីវិត គឺបំពានសិទ្ធិមនុស្ស សិទ្ធិនៃការរស់រានមានជីវិត។» 

ក្នុងអំឡុងពេលមានការឈ្លានពានមកលើទឹកដីកម្ពុជា ក្រសួងបរិស្ថានបានចាត់បញ្ជូនក្រុមការងារមន្រ្តីជំនាញចំនួន១៤ក្រុម សរុបចំនួន៦០នាក់ ដើម្បីចុះអង្កេតតាមដាន ការបំពុលបរិស្ថាននៅតាមតំបន់ព្រំដែនកម្ពុជា-ថៃ។ ដើម្បីទប់ស្កាត់ការបំពុលបរិស្ថាន នៅតាមមណ្ឌលជនភៀសសឹក មន្រ្តីជំនាញក្រសួងបរិស្ថាន សហការជាមួយរដ្ឋបាលខេត្ត មន្ទីរបរិស្ថានខេត្ត ភាគីពាក់ព័ន្ធជំរុញសកម្មភាពដើម្បីឱ្យមានស្អាត នៅតាមមណ្ឌលសុវត្ថិភាពទាំងអស់ ជាពិសេសរៀបចំឱ្យមានការទុកដាក់សំរាម សម្អាតអនាម័យបរិស្ថាន ទប់ស្កាត់ការដុតសំរាម ដុតប្លាស្ទិក ដែលបង្កឱ្យមានការបំពុលខ្យល់។ 

ជាមួយគ្នានេះមន្រ្តីជំនាញក្រសួងបរិស្ថាន បានចុះអង្កេតតាមដានលើគុណភាពទឹក និងគុណភាពខ្យល់ នៅតាមទីតាំងជាច្រើនទាំងក្នុង និងក្រៅមណ្ឌលសុវត្ថិភាពជនភៀសសឹក និងយកសំណាកទឹក សំណាកខ្យល់ និងសារធាតុគីមីពុល មកវិភាគនៅមន្ទីរពិសោធន័ក្រសួងបរិស្ថានបន្ថែមទៀត៕