អាជ្ញាធរនៅក្នុងរដ្ឋធានីដេលីរបស់ប្រទេសឥណ្ឌាបានដាក់ចេញនូវវិធានការតឹងរ៉ឹងកាលពីថ្ងៃពុធ (ថ្ងៃទី១៧ ខែធ្នូ) ក្នុងគោលបំណងទប់ស្កាត់ការបំពុលខ្យល់ រួមទាំងការហាមឃាត់យានយន្តដែលមិនគោរពតាមបទដ្ឋានគ្រប់គ្រងការបំភាយឧស្ម័នចុងក្រោយបំផុត និងការគ្រប់គ្រងបុគ្គលិកធ្វើការនៅក្នុងការិយាល័យឯកជន និងរដ្ឋាភិបាល។

សន្ទស្សន៍គុណភាពខ្យល់ (AQI) នៅក្នុងតំបន់ដេលី ដែលមានប្រជាជនរស់នៅចំនួន ៣០ លាននាក់ ស្ថិតក្នុងកម្រិតធ្ងន់ធ្ងរនៅរយៈពេលប៉ុន្មានថ្ងៃកន្លងមកនេះ ដែលជារឿយៗលើសពី ៤៥០។ លើសពីនេះ អ័ព្ទរាក់ៗនៅក្នុងតំបន់ខ្លះនៃទីក្រុងបានធ្វើឱ្យភាពមើលឃើញកាន់តែអាក្រក់ទៅៗ ដែលប៉ះពាល់ដល់ជើងហោះហើរ និងរថភ្លើង។

ការរឹតបន្តឹងហាមឃាត់ការប្រើប្រាស់រថយន្តដឹកទំនិញប្រើម៉ាស៊ូតចាស់ៗចូលក្នុងទីក្រុង ផ្អាកការសាងសង់ រួមទាំងគម្រោងសាធារណៈ និងដាក់ឱ្យប្រើប្រាស់ប្រព័ន្ធអប់រំបែបចម្រុះ។ លោក Kapil Mishra រដ្ឋមន្ត្រីក្នុងរដ្ឋាភិបាលមូលដ្ឋាន បាននិយាយនៅក្នុងសន្និសីទសារព័ត៌មានមួយនៅទីក្រុងដេលីកាលពីថ្ងៃពុធថា ការិយាល័យឯកជន និងរដ្ឋាភិបាលទាំងអស់នៅក្នុងទីក្រុងនឹងដំណើរការដោយមានបុគ្គលិកធ្វើការ ៥០% ខណៈអ្នកដែលនៅសល់តម្រូវឲ្យធ្វើការពីផ្ទះ។ លើសពីនេះ កម្មករសំណង់ដែលបានចុះឈ្មោះទាំងអស់ ដែលភាគច្រើនទទួលបានប្រាក់ឈ្នួលប្រចាំថ្ងៃ នឹងទទួលបានសំណងចំនួន ១០,០០០ រូពី (១១០ ដុល្លារអាម៉េរិក)ដោយសារតែការហាមឃាត់នេះ៕