អ្នកផលិតមាតិកាម្ហូប ម៉ូនីកា​ និងស្វាមី ដែលជាជនជាតិខ្មែររស់នៅប្រទេសអាឡឺម៉ង បានធ្វើសកម្មភាពមួយធ្វើឲ្យមហាជនផ្ទុះការស្ញើញសរសើរខ្លាំង និងរំភើបក្នុងនាមជាតិសាសន៍តែមួយ ដោយប្ដីប្រពន្ធគូនេះបានឈរលើកបដាទាំងទឹកមុខស្រពោនទាមទារយុត្តិធម៌ និងបង្ហាញឲ្យពិភពលោកបានដឹងពីការឈឺចាប់ដែលកម្ពុជារងការឈ្លានពានពីថៃនៅទីសាធារណៈដោយមិនខ្វល់ពីការខ្មាស់នឿយហត់នោះឡើយ។

ដោយវីដេអូឃ្លីបនៃសកម្មភាពលើកបដាតាមទីសាធារណៈនេះ ត្រូវបានបង្ហោះចែកចាយក្នុងបណ្ដាញសង្គមទទួលបានការចាប់អារម្មណ៍ស៊ែរចែករំលែកយ៉ាងច្រើន មានអ្នកចុចចូលទស្សនាខ្ទង់លានដង ដោយក្នុងបដានោះសសេរពាក្យថា«កម្ពុជាត្រូវការសន្តិភាព កម្ពុជាមិនត្រូវការសង្រ្គាមនោះទេ» ក្នុងនោះយើងសង្គេតឃើញថាមានជនបរទេសជាច្រើនបានចាប់អារម្មណ៍មើលគ្រប់គ្នា។

សូមបញ្ជាក់ផងដែរថា អ្នកផលិតមាតិកា ម៉ូនីកា​ និងស្វាមី បានឈរលើកបដាតាមទីសាធារណៈចំនួន ២ដងរួចមកហើយ ដោយលើកទីមួយនៅទីតាំងកណ្ដាលផ្សារ ក្នុងទីក្រុងប៊ែកឡាំង ប្រទេសអាឡឺម៉ង់ និងលើកទី២ នៅតាមផ្លូវនាទីក្រុងស្តេតទីន ប្រទេសប៉ូឡូញ ផងដែរ៕ អត្ថបទដោយ៖ Sun Darasy