កំពូលតារាចម្រៀងរ៉េបដ៏មានឥទ្ធិពលមួយរូបនៅកម្ពុជា លោក វណ្ណដា បានប្រើប្រាស់សម្លេង បង្ហោះសំណេរជាភាសាអង់គ្លេសក្នុងគោលបំណងឲ្យបណ្ដាអ្នកគាំទ្រនៅក្រៅប្រទេសបានដឹង ពីភាពឈឺចាប់ ព្រមទាំងការព្រួយបារម្ភខ្លាំងចំពោះសុវត្ថិភាពជនស៊ីវិលស្លូតត្រង់ និងកុមារកម្ពុជាដែលរងការវាយប្រហារយ៉ាងកម្រោលពីភាគីថៃ។

ដោយក្នុងនោះលោកបានលើកឡើងយ៉ាងដូច្នេះថា៖ "កុមារ​កម្ពុជា​មិន​អាច​បញ្ចប់​ការ​សិក្សា​បាន​ទេ ហើយ​បែរ​ជា​ភៀស​ខ្លួន​ទៅ​ទី​សុវត្ថិភាព​វិញ​បន្ទាប់​ពី​ភាគី​ថៃ​ចាប់​ផ្តើម​បាញ់ទៅលើពលរដ្ឋកម្ពុជា ពលរដ្ឋ​ទាំងចាស់​ជរា​ និងកុមាររបស់​យើង​ត្រូវ​បង្ខំ​ចិត្ត​ជម្លៀស​ចេញ​ពី​ផ្ទះ​ម្តង​ទៀត"។

បន្ថែមពីនេះ លោកក៏បានបង្ហាញពីការឈឺចាប់ក្នុងនាមជាប្រជាពលរដ្ឋខ្មែរមួយរូប ដែលត្រូវបានភាគីថៃបើកការបាញ់ប្រហារមកលើប្រជាជនស្លូតត្រង់ និងកងទ័ពកម្ពុជា ក៏ដូចជាប្រកាសថ្កោលទោសយ៉ាងដាច់ខាត ចំពោះទង្វើរឈ្លានពានថៃមកលើកម្ពុជា»។

គួរបញ្ជាក់ផងដែរថា នេះមិនមែនជាលើកទីមួយនោះទេដែល លោក វណ្ណដា បានប្រើសម្លេងដើម្បីឲ្យពិភពលោកបានដឹងពីទង្វើរបស់ដ៏អាក្រក់របស់ភាគីថៃ កន្លងមកលោកធ្លាប់បានចេញជាវីដេអូធ្វើឲ្យប្រជាជនថៃជាច្រើនខឹងសម្បារផងដែរ៕ អត្ថបទដោយ៖ Sun Darasy