ប្រធានាធិបតីអាម៉េរិក Donald Trump រំពឹងថា កម្ពុជា និងថៃ នឹងគោរពយ៉ាងពេញលេញចំពោះបទឈប់បាញ់របស់ប្រទេសទាំងពីរ បន្ទាប់ពីការប៉ះទង្គិចគ្នាជាថ្មីតាមបណ្តោយព្រំដែនដែលមានជម្លោះ ដែលបានបង្ខំឱ្យជនស៊ីវិលរាប់ពាន់នាក់ភៀសខ្លួន នេះបើយោងតាមមន្ត្រីជាន់ខ្ពស់នៃរដ្ឋបាលលោក Trump បាននិយាយកាលពីថ្ងៃច័ន្ទ ទី ០៨ ខែធ្នូ ឆ្នាំ២០២៥។

មន្ត្រីជាន់ខ្ពស់មួយរូបដែលបាននិយាយក្នុងលក្ខខណ្ឌមិនបញ្ចេញឈ្មោះថា ប្រធានាធិបតី Trump ប្តេជ្ញាចិត្តចំពោះការបញ្ឈប់អំពើហិង្សាជាបន្តបន្ទាប់ ហើយរំពឹងថារដ្ឋាភិបាលកម្ពុជា និងថៃ នឹងគោរពយ៉ាងពេញលេញនូវការប្តេជ្ញាចិត្តរវាងប្រទេសទាំងពីរក្នុងការបញ្ចប់ជម្លោះនេះ។ ថៃបានបើកការវាយប្រហារតាមផ្លូវអាកាសលើកម្ពុជា ដែលនេះជាទង្វើបំពានលើបទឈប់បាញ់ ខណៈដែលការផ្ទុះឡើងវិញនៃអរិភាពតាមព្រំដែនបានធ្វើឱ្យប៉ះពាល់ដល់បទឈប់បាញ់ដ៏ផុយស្រួយដែលសម្របសម្រួលដោយលោក Trump ​និងនាយករដ្ឋមន្ត្រីម៉ាឡេស៊ី លោក Anwar Ibrahim កាលពីដើមឆ្នាំនេះ។

 ប្រទេសថៃបានបើកការវាយប្រហារតាមអាកាសដើម្បីបំផ្លាញសមត្ថភាពរបស់ប្រទេសកម្ពុជា បន្ទាប់ពីចោទប្រកាន់កម្ពុជាថាបានចល័តអាវុធធុនធ្ងន់ និងប្រើប្រាស់យន្តហោះគ្មានមនុស្សបើកដើម្បីទម្លាក់គ្រាប់បែកលើមូលដ្ឋានទ័ពថៃ ខណៈដែលប្រទេសកម្ពុជាបានថ្កោលទោសការវាយប្រហារទាំងនោះថាជាការឈ្លានពានដ៏អមនុស្សធម៌ដោយមិនបានសងសឹក៕