នៅថ្ងៃទី ០៤ ខែធ្នូ ឆ្នាំ ២០២៥ គណបក្សភឿថៃបានរិះគន់យ៉ាងខ្លាំងចំពោះរដ្ឋាភិបាលថៃចំពោះការគ្រប់គ្រងការប្រកួតកីឡាស៊ីហ្គេមឆ្នាំ ២០២៥ មិនបានល្អ ដោយនិយាយថាវាបានប្រែក្លាយប្រទេសថៃទៅជារឿងកំប្លែងក្នុងតំបន់ ដោយលើកឡើងថាបញ្ហាទាំងនោះមិនមែនកើតឡើងចៃដន្យនោះទេ ប៉ុន្តែដោយសារតែការធ្វេសប្រហែសរបស់អ្នករៀបចំ។

លោក Payu Nueangjamnong អ្នកនាំពាក្យរងនៃគណបក្សភឿថៃ បាននិយាយអំពីកីឡាស៊ីហ្គេមឆ្នាំ ២០២៥ ខាងមុខនេះដោយនៅសល់តែប៉ុន្មានថ្ងៃទៀតប៉ុណ្ណោះមុនពិធីបើកជាផ្លូវការ ដែលប្រទេសថៃបានក្លាយជាម្ចាស់ផ្ទះម្តងទៀតបន្ទាប់ពី ១៨ ឆ្នាំ ហើយយុវជនភាគច្រើននាពេលបច្ចុប្បន្ននេះមិនដែលចូលរួមព្រឹត្តិការណ៍កីឡាស៊ីហ្គេមដែលធ្វើជាម្ចាស់ផ្ទះនៅប្រទេសថៃឡើយ។

អ្នកនាំពាក្យរងរូបនេះ បានលើកឡើងពីបញ្ហាជាច្រើនដូចជាភ្លើងបំភ្លឺពហុកីឡដ្ឋានដែលមានបញ្ហា កំហុសក្នុងការលក់សំបុត្រ ឧបករណ៍មិនស្តង់ដារ និងការផ្គត់ផ្គង់ ដោយបញ្ហាទាំងនេះបណ្តាលមកពីការធ្វេសប្រហែសរបស់អ្នករៀបចំជាជាងបញ្ហាដែលមិនបានមើលឃើញទុកជាមុន។ លោកបានសង្កត់ធ្ងន់ថាអ្នកជំនាញគួរតែចូលរួមតាំងពីដើមដំបូង ហើយបានព្រមានថាកំហុសជាច្រើនទៀតនឹងកើតឡើងនៅចុងបញ្ចប់នៃព្រឹត្តិការណ៍។ លោកបានទទូចថា ការប្រកួតកីឡាស៊ីហ្គេមជារបស់ប្រទេសជាតិ ដោយជំរុញឱ្យមានសកម្មភាពកែតម្រូវជាបន្ទាន់ជាជាងការស្តីបន្ទោសក្រោយព្រឹត្តិការណ៍៕