នៅសល់ប្រមាណ ៩០ថ្ងៃទៀតប៉ុណ្ណោះ ប្រទេសថៃ នឹងត្រូវបើកព្រឹត្តិការណ៍ប្រកួតកីឡាធំបំផុតប្រចាំតំបន់អាស៊ីអាគ្នេយ៍ ខណៈមកទល់និងពេលនេះ ប្រទេសថៃកំពុងខ្វះលុយប្រមាណ ១៤លានដុល្លារអាមេរិកទៀត ដើម្បីរៀបចំព្រឹត្តការណ៍មួយនេះដោយរលូន។

នាយកអាជ្ញាធរកីឡាថៃ (SAT) លោក Kongsak Yodmanee បានបញ្ជាក់ថា ការចែកចាយ និងកៀគរថវិកានៅមិនទាន់បញ្ចប់នៅឡើយទេ។

លោក Kongsak បានលើកឡើងយ៉ាងដូច្នេះថា ៖ «ថវិកាសម្រាប់ SEA Games នៅតែខ្វះ ទោះបីជាយ៉ាងណា គិតត្រឹមខែកញ្ញា ឆ្នាំ ២០២៥ គណៈកម្មការរៀបចំការប្រកួតនៅខ្វះលុយប្រមាណ ៤៥៩លានបាត ឬស្មើនឹងប្រមាណ ១៤លានដុល្លារអាមេរិក។ ផ្នែកមួយនៃបញ្ហាកង្វះថវិការនៃការរៀបចំនេះ គឺដោយសារការកាត់ថវិកាពីនាយកដ្ឋានថវិកា» «យើងបានស្នើថវិកាបន្ថែមនេះ ដើម្បីគ្របដណ្តប់លើការពង្រីកចំនួនកីឡា អត្តពលិក និងការចំណាយដំណើរការខ្ពស់ជាងមុន»។

គួរបញ្ជាក់ថា កីឡាស៊ីហ្គេម លើកទី៣៣ នឹងចាប់ពីថ្ងៃទី ៩ ដល់ ទី២០ ខែធ្នូ ឆ្នាំ ២០២៥ ដោយរៀបចំនៅទីក្រុងបាងកក សុងខ្លា និង ឈុនបុរី ដែលរំពឹងមានកីឡាករ កីឡាការិនីប្រមាណ ១២០០០នាក់មកពី ១១ ប្រទេសចូលរួមប្រកួត លើ៥០ប្រភេទកីឡាដែលមាន ៥៧៤វិញ្ញាសា។ចំណែកកីឡា អាស៊ានប៉ារ៉ាហ្គេម លើកទី១៣ នឹងចាប់ពីថ្ងៃ២០ ដល់ ទី២៦ ខែមករា ឆ្នាំ ២០២៦ ដោយមានកីឡាចំនួន ១៩ប្រភេទ ស្មើនឹង ៥៣៦វិញ្ញាសា៕