អ្នកជំនួញអនឡាញដ៏ល្បី ចែយៀក បានប្រកាសឧបត្ថម្ភម៉ូតូជាច្រើនគ្រឿង និងរថយន្ត ជូនទៅដល់វីរៈកងទ័ពជួរមុខដែលរងការខូចខាតនូវយានជំនិះ ពោល គឺ អាចមកបើកយកម៉ូតូថ្មីបានពីលោកស្រីផ្ទាល់ ការណ៍នេះ សបញ្ជាក់ពីទឹកចិត្តដ៏ប្រពៃមិនអាចកាត់ថ្លៃបាន ដែលអ្នកជំនួញអនឡាញរូបនេះហ៊ានចំណាយថវិការផ្ទាល់ខ្លួនយ៉ាងច្រើន ដើម្បីជួយដល់សង្គមជាតិស្របពេលដែលកម្ពុជាកំពុងតែមានបញ្ហាឈ្លានពានពីកងទ័ពសៀម។

នេះបើយោងតាមការបង្ហោះសំណេររបស់ ចែយៀក បានប្រកាសបែបនេះថា៖ «បងប្អូន វីរៈកងទ័ព ដែលខូចខាតទ្រព្យសម្បត្តិអាចមកបើកម៉ូតូ នៅក្រុមហ៊ុនMiss បានណា ខូចខាតHonda Dream បើក Honda Dreamខូចខាត ម៉ូតូម៉ាក Wave បើក ម៉ូតូម៉ាក Wave គ្មានម៉ូតូដឹកស្បៀងខ្ញុំបរិច្ចាគថែម ១០គ្រឿង សម្រាប់ប្រើប្រាស់រួម ក្នុងការចូលរួមជួយសង្គ្រោះជាតិទាំងអស់គ្នា ស្មារតីខ្មែរខ្លាំង»។

គួរបញ្ជាក់ផងដែរថា អ្នកជំនួញអនឡាញ ចែយៀក កំពុងតែអង្រួនចិត្តមហាជនឲ្យស្ញប់ស្ញែង និងស្រលាញ់ពេញចិត្តគ្រប់ៗគ្នា ខណៈប្រទេសជាតិកំពុងរងការឈ្លានពាន អ្នកជំនួញរូបនេះគឺមិនអោបដៃឈរមើលនោះឡើយ លោកស្រីតែងតែស្វះស្វែងជួយជាថវិការក៏ដូចជាសម្ភារៈប្រើប្រាស់ចាំបាច់ដល់ជនភៀសសឹក ក៏ដូចជាវីរៈកងទ័ពជួរមុខ ដែលត្រង់ចំនុចទាំងនេះហើយ ទើបធ្វើឲ្យអ្នកជំនួញអនឡាញរូបនេះទទួលបានការកោតសរសើរនិងគាំទ្រពីប្រជាពលរដ្ឋខ្មែរផងដែរ៕ អត្ថបទដោយ៖ Sun Darasy