សម្ដេចធិបតី ភាសាខ្មែរនឹងនៅតែជាភាសាជាតិតែមួយគត់ នៅក្នុងកម្មវិធីអប់រំរបស់ជាតិ រីឯភាសាបារាំង អង់គ្លេស ជប៉ុន កូរ៉េ ផ្សេងៗទៀត ជាភាសាសម្រាប់រៀនបន្ទាប់បន្សំប៉ុណ្ណោះ។​ នេះបើតាមការលើកឡើងរបស់ សម្តេចមហាបវរធិបតី ហ៊ុន ម៉ាណែត​​ នាយករដ្ឋមន្ត្រី នៃព្រះរាជាណាចក្រកម្ពុជា​​ អញ្ជើញជាអធិបតី “​សំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត ៣”។ក្នុងឱកាសនោះ សម្ដេចធិបតី ក៏បានមានប្រសាសន៍ថា «ភាសាបរទេសសម្រាប់ក្មេងតូចៗ គួរដាក់បញ្ចូលតិចតួចបានហើយ! គួរចាំដល់ថ្នាក់ធំបន្តិច (ថ្នាក់ទី៤, ៥ ឬ ៦ឡើង) ចាំយើងបន្ថែមឱ្យច្រើន។ ទំនើបកម្ម សូមកុំចោលមូលដ្ឋាន! នៅតូចៗ គួរដាក់ភាសាខ្មែរនិងគណិតវិទ្យាឱ្យច្រើន!»។

បន្ថែមពីនេះ សម្តេចធិបតីនាយករដ្ឋមន្ត្រី ក៏បានបញ្ជាក់ថា ពេលធ្វើការ និង ចេញរៀនសូត្រ ក្មួយៗនឹងដឹងថា ភាសាជាតិសំខាន់ខ្លាំងប៉ុណ្ណា។ ជាមួយគ្នានេះ សម្តេចធិបតី ហ៊ុន ម៉ាណែត ក៏បានបន្តលើកទឹកចិត្តឱ្យក្រសួងអប់រំ ពង្រឹងមូលដ្ឋានឱ្យកាន់តែរឹងមាំផងដែរ៕