សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ដំណឹងមរណភាព! ឯកឧត្តមសាស្ត្រាចារ្យ Federico MAYOR ZARAGOZA អតីតអគ្គនាយកនៃអង្គការយូណេស្កូ

ជាមួយដំណឹងមរណភាពនេះ អាជ្ញាធរជាតិអប្សរា ក៏សូមចូលរួមរំលែកទុក្ខដ៏ក្រៀមក្រំបំផុតចំពោះការបាត់បង់ដោយគ្មានថ្ងៃវិលត្រឡប់វិញជាមួយក្រុមគ្រួសាររបស់ ឯកឧត្តមសាស្ត្រាចារ្យ Federico MAYOR ZARAGOZA។

២. នាយកដ្ឋានប្រឆាំងបទល្មើសបច្ចេកវិទ្យា ចាប់ខ្លួនជនសង្ស័យ មុខសញ្ញាឆបោកប្រាក់តាមបណ្ដាញសង្គម

នាយកដ្ឋានប្រឆាំងបទល្មើសបច្ចេកវិទ្យា បានធ្វើការស្រាវជ្រាវ និងចាប់ខ្លួនជនសង្ស័យ០១រូប ដែលជាមុខសញ្ញាសកម្មលើបទល្មើសឆបោកប្រាក់តាមបណ្ដាញសង្គម ក្រោមរូបភាពទិញ-លក់ទំព័រគណនីហ្វេសប៊ុក និងកម្ចីប្រាក់អនឡាញ ផ្ទេរប្រាក់តាមគណនីធនាគារផ្សេងៗ។

៣. មន្ទីរពេទ្យបង្អែកប៉ោយប៉ែត បដិសេធព័ត៌មានថា «ការប្រើពេទ្យគ្មានជំនាញធ្វើឱ្យម្ដាយ និងទារកស្លាប់ជាង​១០នាក់»

មន្ទីរពេទ្យបង្អែកប៉ោយប៉ែត បានបដិសេធ និងច្រានចោលទាំងស្រុងចំពោះការចុះផ្សាយព័ត៌មាន ដែលមានខ្លឹមសារថា «ការប្រើពេទ្យគ្មានជំនាញធ្វើឱ្យម្ដាយ និងទារកស្លាប់ជាង១០នាក់នៅមន្ទីរពេទ្យបង្អែកប៉ោយប៉ែត»។

៤. ពេទ្យបង្អែកខេត្តព្រះសីហនុ បដិសេធករណីយកអ្នកជំងឺក្រីក្រមកដាក់ចោលក្រៅអាគារពេទ្យ

ក្រោយមានការផ្សព្វផ្សាយ ថាពេទ្យបង្អែកខេត្តព្រះសីហនុយកអ្នកជំងឺក្រីក្រមកដាក់ចោលក្រៅអាគារពេទ្យ នៅថ្ងៃ២២ ខែធ្នូ ឆ្នាំ២០២៤នេះ ទាំងគ្រូពេទ្យ ទាំងថ្នាក់ដឹកនាំមន្ទីរសុខាភិបាល ខេត្តព្រះសីហនុចេញមកពន្យល់ថា គឺជារឿងមិនពិត។

៥. កិច្ចពិភាក្សាជំរុញលំហូរភ្ញៀវទេចរ រវាងរដ្ឋមន្ត្រីក្រសួងទេសចរណ៍ និងតំណាងក្រុមហ៊ុនCTG

ថ្នាក់ដឹកនាំកម្ពុជា ចិន ពិភាក្សាផ្លាស់ប្តូរទស្សនៈ និងយុទ្ធសាស្រ្តសំរាប់ពង្រឹងកិច្ចសហប្រតិបត្តិការរៀបចំកញ្ចប់ទស្សនកិច្ច និងជំរុញលំហូរភ្ញៀវទេចររវាងប្រទេសទាំងពីរ កម្ពុជា-ចិន ជាពិសេសប្រជាពលរដ្ឋពីតំបន់រដ្ឋបាលពិសេសហុងកុង តំបន់រដ្ឋបាលពិសេសម៉ាកាវ និងតំបន់ជុំវិញ។

៦. សមត្ថកិច្ចឃាត់ខ្លួនសិស្សសាលា ៣នាក់ ករណីវាយគ្នា នៅមុខវិទ្យាល័យជាស៊ីមសន្ធរម៉ុក

កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានឃាត់ក្មេងប្រុស០៣នាក់ ករណីវាយគ្នាទៅវិញទៅមក ប្រព្រឹត្តនៅចំណុចមុខវិទ្យាល័យជាស៊ីមសន្ធរម៉ុក ផ្លូវលេខ១២៨ ក្រុមទី២ ភូមិ១ សង្កាត់ទឹកល្អក់ទី១ ខណ្ឌទួលគោក នាំយកមកសួរនាំនៅប៉ុស្តិ៍នគរបាលរដ្ឋបាលទឹកល្អក់ទី១ នាថ្ងៃទី២១ ខែធ្នូ ឆ្នាំ២០២៤ ម៉ោងប្រហែល១៧:៣០នាទី ។

៧. ដំណើរទស្សនកិច្ចតាមក្រវាត់ព្រំដែនភូមិភាគឦសាន និងស្វែងយល់អំពីការងារព្រំដែន

ដំណើរទស្សនកិច្ចតាមក្រវាត់ព្រំដែនភូមិភាគឦសានប្រកបដោយក្តីសប្បាយរីករាយ សាមគ្គីភាពមហាគ្រួសារខ្មែរ និងការយល់ដឹងអំពីការងារព្រំដែន។ តាមរយៈទស្សនកិច្ចនេះ ប្រជាពលរដ្ឋបានយល់ច្បាស់អំពីអត្ថន័យនៃពាក្យថា "រាជរដ្ឋាភិបាលមិនអនុញ្ញាតឱ្យបាត់បង់ទឹកដីសូម្បីមួយមីល្លីម៉ែត្រ"។

៨. អតីតតារាសម្ដែង សឿ សុធារ៉ា ចាប់យកមុខរបរថ្មីដើម្បីជីវភាពប្រចាំថ្ងៃ និងចិញ្ចឹមកូនៗ

អតីតតារាសម្ដែង អ្នកនាង សឿ សុធារ៉ា ងាកមកចាប់មុខរបរថ្មីក្នុងវិស័យអនឡាញ ដោយនាងចាប់ផ្ដើមពីមុខរបរតូចមួយ លក់សាច់គោងៀត, ត្រីងៀត, និងសាច់ក្រកគោ ដើម្បីរកចំណូលផ្គន់ផ្គង់ជីវភាពប្រចាំថ្ងៃក៏ដូចជាដើម្បីចិញ្ចឹមមើលថែកូនរហូតដល់ទៅពីនាក់ ដែលស្របពេលនេះទីផ្សារនៅក្នុងការងារសិល្បៈរបស់នាងក៏ហាក់មានការធ្លាក់ចុះ។

៩. ពិតជាភរិយាដ៏ល្អ! អ្នកនាង សួន ចន្ថា តស៊ូធ្វើការរកប្រាក់ដើម្បីមើលថែស្វាមីមានជំងឺជាង ១២ឆ្នាំ

តារាចម្រៀងជើងចាស់ អ្នកនាង សួន ចន្ថា បានបង្ហោះសារមួយក្នុងបណ្ដាញសង្គមធ្វើឲ្យមហាជនមានការភ្ញាក់ផ្អើលដោយសភាពស្វាមីរបស់តារាស្រីរូបនេះហាក់ស្គមស្គាំង ដោយគ្រប់គ្នាឃើញហើយកើតក្ដីអាណិត និងសរសើរទៅទឹកចិត្តការលះបង់របស់ អ្នកនាង សួន ចន្ថា ដែលខំព្យាយាមធ្វើការរកថវិកាមើលថែស្វាមីទាំងយប់ទាំងថ្ងៃ ទោះមមាញឹកការងារយ៉ាងណាក៏មិនភ្លេចតួរនាទីជាភរិយាដ៏ល្អដែរ ដោយស្វាមីអ្នកនាងមានជំងឺប្រចាំកាយលើសឈាម និងទឹកនោមផ្អែម អស់រយៈពេលជាច្រើនឆ្នាំមកហើយ។

១០. លែងលាក់បាំង! កញ្ញា សាឡាត់ ស្រីឡាង​ ទម្លាយថាខ្លួនកំពុងមានបញ្ហារឿងបំណុលព្យាយាមរកដំណោះស្រាយ

មួយរយៈពេលចុងក្រោយនេះ តារាសម្ដែងស្រី សាឡាត់ ស្រីឡាង ហាក់ស្ងប់ស្ងាត់ពីការងារសិល្បៈដោយនាងបានចាប់យកការបើកជំនួញរកស៊ីវិញ តែបន្តមកក៏លេចលឺមានបញ្ហាបំណុលដល់ថ្នាក់បង្ហោះចែកចាយក្នុងបណ្ដាញសង្គមធ្វើឲ្យមហាជនជាច្រើនមានការភ្ញាក់ផ្អើលម្ដងរួចមកហើយ ដោយនាពេលថ្មីៗនាងក៏បានបង្ហោះសារមួយទម្លាយប្រាប់មហាជនត្រង់ៗដោយមិនលាក់បាំងថាខ្លួនកំពុងតែមានបញ្ហារឿងបំណុលពិតមែន៕