បច្ចុប្បន្ននេះ សង្គមកំពុងផ្លាស់ប្តូរយ៉ាងឆាប់រហ័ស ហើយអាពាហ៍ពិពាហ៍កាន់តែផុយស្រួយ។ ដូច្នេះហើយ ដើម្បីរក្សាចំណងអាពាហ៍ពិពាហ៍ឱ្យបានយូរ គូស្វាមីភរិយាគួរឆ្លៀតពេលធ្វើរឿងមានប្រយោជន៍ជាមួយគ្នា ដើម្បីជួយចិញ្ចឹមបីបាច់ថែរក្សាអារម្មណ៍របស់អ្នកទាំងពីរជារៀងរាល់ថ្ងៃ។ នេះពិតជាមានសារៈសំខាន់ខ្លាំងណាស់ មិនថាការងារមមាញឹក ឬទំនួលខុសត្រូវក្នុងភាពជាឪពុកម្តាយធ្វើឱ្យអ្នកតានតឹង និងនឿយហត់ប៉ុនណាទេ តែកុំភ្លេចចំណាយពេលជាមួយដៃគូឱ្យបានច្រើន។ មានវិធីជាច្រើនសម្រាប់អ្នក ដើម្បីពង្រឹងទំនាក់ទំនងរវាងស្វាមី និងភរិយា។ នេះគឺជាគន្លឹះទាំង ៤ ដែលប្ដីប្រពន្ធគួរតែធ្វើរួមគ្នា ដើម្បីអង្រឹងចំណងជីវិតគូរបស់អ្នក។

១. ចម្អិនអាហារជាមួយគ្នា ៖ នៅថ្ងៃឈប់សម្រាក ប្រសិនបើអ្នក និងស្វាមីរបស់អ្នកមិនមានគម្រោងអ្វីទេ សូមសាកល្បងធ្វើម្ហូបជាមួយគ្នានៅក្នុងផ្ទះបាយ។ វាអាចជាម្ហូបដែលអ្នកចូលចិត្ត ប្តីរបស់អ្នកចូលចិត្ត កូនរបស់អ្នកចូលចិត្ត ឬគ្រួសារទាំងមូលចូលចិត្ត ឬអាចជាមុខម្ហូបថ្មីដែលអ្នក និងស្វាមីរបស់អ្នកទើបតែបង្កើតឡើង។ ចំណុចសំខាន់នៅត្រង់នេះ គឺដោយគ្រាន់តែចំណាយពេលវេលាតិចតួចនៅក្នុងផ្ទះបាយ អ្នក និងស្វាមីរបស់អ្នកនឹងក្លាយជាគូស្វាមីភរិយាដ៏ល្អ និងមានឱកាសកាន់តែច្រើនក្នុងការនៅជាមួយគ្នា។

២. ហាត់ប្រាណជាមួយគ្នា ៖ លំហាត់ប្រាណតែងតែជាឱសថដ៏មានតម្លៃសម្រាប់សុខភាពរបស់យើង។ មនុស្សជាច្រើនដឹងថា ការហាត់ប្រាណទៀងទាត់មានប្រយោជន៍ច្រើនសម្រាប់សុខភាព ប៉ុន្តែមានមនុស្សតិចណាស់ដែលសម្រេចបានប្រសិទ្ធភាពនេះ។ មូលហេតុគឺមកពីអ្នកមិនតាំងចិត្តពិតប្រាកដ មិនមានការលើកទឹកចិត្ត ដូច្នេះហើយតែងតែមានអារម្មណ៍បាក់ទឹកចិត្តរាល់ពេលដែលអ្នកហាត់។ ចុះហេតុអ្វីបានជាអ្នកមិនគិតអំពីការអញ្ជើញស្វាមីរបស់អ្នកមកហាត់ប្រាណជាមួយអ្នក? នេះនឹងនាំមកនូវអត្ថប្រយោជន៍សុខភាពដ៏អស្ចារ្យសម្រាប់អ្នកទាំងពីរ ហើយនឹងជម្រុញអ្នកឱ្យរក្សាទម្លាប់របស់អ្នក និងកាន់តែរំភើបរាល់ពេលដែលអ្នកហាត់ប្រាណ។ ជាពិសេស វាក៏ជាឱកាសមួយក្នុងការពង្រឹងចំណងមិត្តភាពរវាងអ្នក និងស្វាមី បន្ទាប់ពីនឿយហត់ពេលត្រឡប់មកពីធ្វើការវិញ។

៣. មើលភាពយន្តជាមួយគ្នា ៖ រាត្រីដ៏សុខសាន្តដែលអ្នក និងស្វាមីរបស់អ្នកអង្គុយមើលរឿងជាមួយគ្នា ទោះបីជាស្វាមីរបស់អ្នកអាចដេកលក់នៅមុខភាពយន្តមនោសញ្ចេតនាដែលអ្នកចូលចិត្តក៏ដោយ ឬអ្នកខំប្រឹងមើលនៅមុខភាពយន្តសកម្មភាពដែលប្តីអ្នកចូលចិត្តក៏ដោយ នោះក៏ជាពេលវេលាដ៏មានតម្លៃដែលអ្នក និងស្វាមីអាចនៅជិតគ្នាបាន។

៤. អានអត្ថបទឱ្យគ្នាស្ដាប់ទៅវិញទៅមក ៖ ទម្លាប់នៃការអានឱ្យគ្នាទៅវិញទៅមកនូវអត្ថបទខ្លីៗ កំណាព្យ យោបល់ដ៏មុតស្រួច សំបុត្រពីសាច់ញាតិ ឬមិត្តភ័ក្តិ... គឺជាពេលវេលាដ៏ជ្រាលជ្រៅមួយ នៅពេលដែលអ្នក និងស្វាមីរបស់អ្នកអាចចែករំលែកគ្នាទៅវិញទៅមកនូវចំណាប់អារម្មណ៍ និងគំនិតរបស់អ្នក អារម្មណ៍ និងកង្វល់ដល់គ្នាទៅវិញទៅមក នេះគឺជាការព្យាបាលដល់ដួងចិត្ត និងរឹតចំណងមនោសញ្ចេតនាជាមួយគ្នារឹតតែរឹងមាំ៕