សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖១. ក្រោយពីស្ពានមិត្តភាពកម្ពុជា-កូរ៉េ សាងសង់រួច សកម្មភាពមនុស្ស សេដ្ឋកិច្ចនៅអរិយក្សត្រ នឹងកើនឡើង

សម្តេចធិបតី ហ៊ុន ម៉ាណែត គូសបញ្ជាក់ថា ក្រោយពីស្ពានមិត្តភាពកម្ពុជា-កូរ៉េ សាងសង់រួច សកម្មភាពមនុស្ស សេដ្ឋកិច្ចនៅអរិយក្សត្រ និងចរន្តនៃការស្នាក់នៅរបស់ប្រជាជននឹងកើនឡើង។

២. រយៈពេល១១ខែ ការដោះស្រាយគម្រោងជាប់គាំងក្នុងខេត្តព្រះសីហនុ មានទុនវិនិយោគសរុបជាង ២០០០ លានដុល្លារ

ក្នុងរយៈពេល ១១ ខែក្នុងឆ្នាំ ២០២៤នេះ ការដោះស្រាយគម្រោងជាប់គាំងក្នុងខេត្តព្រះសីហនុមានចំនួន ១០៣ គម្រោង និងមានទុនវិនិយោគសរុប ២ ៥១០ លានដុល្លារអាម៉េរិក។

៣. អ្នកជំនាញនៃក្រសួងវប្បធម៌ បញ្ចប់ការជួសជុលចេតិយស្នងការចុងក្រោយនៃសាធារណរដ្ឋបារាំងប្រចាំនៅកម្ពុជា ក្នុងសម័យអាណានិគម

អគ្គនាយកដ្ឋានបេតិកភណ្ឌ នៃក្រសួងវប្បធម៌ និងវិចិត្រសិល្បៈ សហការជាមួយក្រុមប្រឹក្សាអភិវឌ្ឍន៍កម្ពុជា ជួសជុល និងអភិរក្សទម្រង់ដើមនៃចេតិយលោក ហ្សង់ អ៊ែលដឺរេម៉ុង។

៤. អាយស៊ីស៊ី-អង្គរ/សំបូរព្រៃគុក ប្ដេជ្ញាបន្តពង្រឹង និងពង្រីកកិច្ចសហប្រតិបត្តិការជាមួយរាជរដ្ឋាភិបាលកម្ពុជាបន្ថែមទៀត

គណៈប្រតិភូ អាយស៊ីស៊ី-អង្គរ/សំបូរព្រៃគុក ប្ដេជ្ញាចិត្តខ្ពស់ បន្តចូលរួមចំណែកពង្រឹង និងពង្រីកកិច្ចសហប្រតិបត្តិការរវាង យន្តការអាយស៊ីស៊ី-អង្គរ/សំបូរព្រៃគុក និងរាជរដ្ឋាភិបាលកម្ពុជាបន្ថែមទៀត។

៥. គ្រោះរញ្ជួយដីកម្រិត ៧.៣រ៉ិចទ័រ វាយប្រហារសាធារណរដ្ឋវ៉ាន់នូអាទូ និងព្រមានអំពីរលកយក្សស៊ូណាមិ

គ្រោះរញ្ជួយដីកម្រិត៧.៣រ៉ិចទ័រ បានវាយប្រហារនៅចម្ងាយ៣០គីឡូម៉ែត្រ នៃភាគខាងលិចទីក្រុង Port Vila នៃសាធារណរដ្ឋវ៉ាន់នូអាទូ ដែលជាប្រទេសមួយ មានទីតាំងនៅភាគនិរតីនៃមហាសមុទ្រប៉ាស៊ីហ្វិក។

៦. គណបក្សប្រឆាំងធំរបស់កូរ៉េខាងត្បូង រិះគន់គណបក្សកាន់អំណាចចំពោះមុខតំណែងលើការតែងតាំងតាមប្រព័ន្ធតុលាការ

អ្នកនាំពាក្យបក្សប្រឆាំងដ៏សំខាន់របស់កូរ៉េខាងត្បូង បាននិយាយថា ប្រធានាធិបតីស្តីទីកូរ៉េខាងត្បូងព្យាយាមការពារ លោក Yoon Suk Yeol

៧. សម្ដេចធិបតី អំពាវនាវឲ្យប្រជាពលរដ្ឋបន្តថែរក្សា និងការពារនូវសុខសន្តិភាព ឱ្យបានជាដាច់ខាត

សន្តិភាពដែលកម្ពុជារកបានក្នុងពេល២៦ឆ្នាំមកនេះ គឺមានរយៈពេលវែងសម្រាប់៥០០ឆ្នាំកន្លងមក ប៉ុន្តែមហិច្ឆតារបស់ខ្ញុំមិនចង់បានត្រឹមតែប៉ុណ្ណឹងទេ គឺចង់បានសុខសន្តិភាពរហូតទៅ ដូច្នេះខ្ញុំសូមបន្តអំពាវនាវឲ្យបងប្អូនប្រជាពលរដ្ឋបន្តថែរក្សា និងការពារនូវសុខសន្តិភាពនេះ ឱ្យបានជាដាច់ខាត។

៨. អគ្គិសនីកម្ពុជា ដាក់ឱ្យដំណើរការអនុស្ថានីយថ្មីតង់ស្យុង ១១៥គីឡូវ៉ុល នៅក្រុងសំពៅពូន

អគ្គិសនីកម្ពុជា បានបញ្ចប់ការធ្វើតេស្ត និងដាក់ឱ្យដំណើរការខ្សែបញ្ជូនតង់ស្យុង ខ្ពស់ ១១៥គីឡូវ៉ុល ពីអនុស្ថានីយអគ្គិសនីទួលក្រសាំង ស្ថិតក្នុងសង្កាត់រកាខ្ពស់ ក្រុងតាខ្មៅ ខេត្តកណ្តាល មកអនុស្ថានីយអគ្គិសនីសំពៅពូន ដែលមានប្រវែងប្រមាណ ៥៤ គីឡូម៉ែត្រ និងអនុស្ថានីយសំពៅពូន តង់ស្យុង ១១៥/២២គីឡូវ៉ុល អានុភាពផ្គត់ផ្គង់ ៧៥ មេហ្គាវ៉ុលអំពែរ ស្ថិតក្នុងសង្កាត់សំពៅពូន ក្រុងសំពៅពូន ខេត្តកណ្តាល ដោយចំណាយថវិកាសរុបប្រមាណ ១៥ លានដុល្លារអាមេរិក។

៩. ករណីអគ្គិភ័យឆាបឆេះផ្ទះមួយកន្លែង នៅចំណុចបុរីរំចេក សង្កាត់ព្រៃស

ករណីអគ្គិភ័យបានឆាបឆេះផ្ទះមួយកន្លែង បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញជួយអន្តរាគមន៍បាញ់ទឹកពន្លត់ ហេតុការណ៍នេះបានកើតឡើងនៅវេលាម៉ោង ៩និង៣០នាទីព្រឹក ថ្ងៃទី១៧ ខែធ្នូ ឆ្នាំ២០២៤ ដែលស្ថិតចំណុចក្នុងបុរីរំចេក ផ្ទះលេខE18 ផ្លូវផ្ការំយោល ភូមិគោកបន្ទាយ សង្កាត់ព្រៃស ខណ្ឌដង្កោ រាជធានីភ្នំពេញ។

១០. ភ្ញៀវបរទេស អាចចូលប្រទេសចិនដោយគ្មានទិដ្ឋាការរយៈពេល ១០ ថ្ងៃ ដែលមានបើកក្នុងខេត្តចំនួន ២៤

ប្រទេសចិនបានប្រកាសថ្ងៃអង្គារនេះ អំពីការបន្ធូរបន្ថយគោលនយោបាយឆ្លងកាត់ដោយគ្មានទិដ្ឋាការរបស់ខ្លួន ដោយពង្រីកការស្នាក់នៅដែលត្រូវបានអនុញ្ញាតសម្រាប់អ្នកដំណើរបរទេសដែលមានសិទ្ធិដល់ទៅ ២៤០ ម៉ោង ឬ ១០ ថ្ងៃ ដែលកន្លងមកមានតែ ៧២ ទៅ ១៤៤ ម៉ោង ខណៈដែលអាជ្ញាធរមានគោលបំណងទាក់ទាញភ្ញៀវបរទេសកាន់តែច្រើន។