មហាជនអ្នងលេងបណ្ដាញសង្គមហាក់ងាកមកចាប់អារម្មណ៍ និងសម្ដែងអារម្មណ៍រំភើបចំពោះ ពិធីការិនី សុភ័ក្រ កុសុម៉ា និងកូនកំលោះ បានលះបងភាពនៅលីវ ស្រវ៉ាយកជីវិតគូយ៉ាងមានសុភមង្គល និងមានសេចក្ដីសុខ ដោយមង្គលការតារាស្រីសម្ដីចាក់ទឹកមិនលេចរូបនេះបានប្រារព្ធធ្វើឡើងនាថ្ងៃទី ៣ និង៤ ខែវិច្ឆិកា ឆ្នាំ២០២៤ នៅអគារ OCIC។

បន្ថែមពីនេះបើក្រឡេកមកមើលពីការរៀបចំក្នុងកម្មវិធីទាំងមូលរបស់ពិធីការិនីរូបនេះវិញគឺមានការតុបតែងយ៉ាងប្រណិតស្រស់ស្អាតមានរំលេចទៅដោយផ្កាស្រស់ពណ៌ស អមជាមួយរូបថត Pre Wedding ផ្សេងៗទៀតហាក់មើលទៅកាន់តែស្អាតគ្រប់ប្លង់ ឯសម្រស់កូនក្រមុំ និងកូនកំលោះ ក្នុងថ្ងៃដ៏ពិសេសនេះវិញ គ្រប់ឈុតនីមួយៗសុទ្ធសឹងតែថ្មីប្លែកស្រស់ស្អាតគ្រប់ឈុត បង្កើនសម្រស់កាន់តែស្អាតលេចធ្លោមួយកម្រិតទៀត ធ្វើឲ្យមង្គលការមួយនេះប្រកបដោយក្ដីពេញចិត្ត សុខសុភមង្គល មានស្នាមញញឹម សើចសប្បាយគ្រប់ៗគ្នាដោយសារតែភាពកំប្លែងក្រមិចក្រមើមរបស់កូនក្រមុំ។

យ៉ាងណាមិញ ក្នុងថ្ងៃដ៏ពិសេសនេះយើងសង្កេតឃើញថាមានការចូលរួមយ៉ាងច្រើនកុះករពីសំណាក់មិត្តរួមអាជីពសិល្បៈ ក័៏ដូចជាក្រុមគ្រួសារញាតិមិត្តជិតឆ្ងាយ និងអ្នកមានមុខមាត់ក្នុងសង្គមជាច្រើនបានអញ្ជើញចូលរួមមិនអាចអវត្តមានបានទេ ក៏ដោយសារតែ កញ្ញា សុភ័ក្រ កុសុម៉ា ជាតារាស្រីមួយរូបដែលមានភាពរួសរាយរាក់ទាក់ពូកែកំប្លុកកំប្លែងទើបគ្រប់គ្នាស្រឡាញ់ពេញចិត្តមិនអាចចោល ឬរំលងមិនចូលរួមអបអរនោះទេ៕ សម្រួលដោយ៖ Sun Darasy