លោក Jason Park (PSY) ម្ចាស់បទ Gangnam Style បានធ្វើឲ្យកក្រើពេញបរិវេណកោះពេជ្រ ដោយវត្តមានរបស់តារាកូរ៉េរូបនេះបានមកប្រទេសកម្ពុជាយើង ដើម្បីសម្ដែងក្នុងការប្រគុំតន្រ្តីដ៏ធំមួយ នាថ្ងៃទី២ ខែវិច្ឆកា ឆ្នាំ២០២៤ ដោយការបង្ហាញខ្លួនរបស់​លោក​បានធ្វើឲ្យបណ្ដាលអ្នកគាំទ្រនៅកម្ពុជា ពិសេសបណ្ដាមិត្តយុវវ័យដែលនិយមចូលចិត្តចម្រៀងញាក់កន្រ្តាក់អារម្មណ៍របស់លោកបានសម្ដែងអារម្មណ៍រំភើបចូលរួមយ៉ាងច្រើនកុះករ បើទោះបីជាអាកាសធាតុមិនសូវអំណោយផលមានភ្លៀងធ្លាក់យ៉ាងណាក្ដី ក៏បណ្ដាហ្វេនៗនៅតែទន្ទឹងរង់ចាំទស្សនា ទាំងភាពសប្បាយរីករាយក្រោមតំណក់ទឹកភ្លៀងនារាត្រីដ៏អស្ចារ្យនោះ។

បន្ថែមពីនេះ លោក PSY ក៏មានក្ដីរំភើបជាខ្លាំងក្រោយឃើញមានអ្នកទស្សនាគាំទ្ររូបលោកយ៉ាងច្រើន ដែលនេះជាលើកទីមួយហើយសម្រាប់គាត់បានមកកម្ពុជាយើងដើម្បីសម្ដែង លោកមិននឹកស្មានថាមានអ្នកគាំទ្រច្រើនយ៉ាងនេះទេ វាពិតជាអស្ចារ្យណាស់សម្រាប់រូបលោក។

គួរបញ្ជាក់ផងដែរថា លោក Jason Park (PSY) គឺជាតារាចម្រៀងកូរ៉េមួយរូបដ៏មានប្រជាប្រិយភាព ដោយសារបទចម្រៀងនីមួយៗរបស់លោកទទួលបានការគាំទ្រ ពិសេសបទ Gangnam Style ទទួលបានការគាំទ្រខ្លាំងជាគេ បើទោះបីជាបទនេះចេញយូរក្ដីតែនៅតែល្បីនឹងដកជាប់ក្នុងចិត្តអ្នកគាំទ្រផងដែរ៕ សម្រួលដោយ៖ Sun Darasy