ព្យុះទីហ្វុង Kong Rey បានបង្កការបំផ្លិចបំផ្លាញពាសពេញកោះតៃវ៉ាន់ ចាប់តាំងពីដើមថ្ងៃព្រហស្បតិ៍ ជាមួយនឹងខ្យល់បក់ខ្លាំង និងភ្លៀងធ្លាក់ខ្លាំង បណ្តាលឲ្យមានការរអិលបាក់ដី ខ្យល់បក់បោករលំភ្លើងបំភ្លឺផ្លូវ និងដើមឈើ ព្រមទាំងមានទឹកជំនន់តាមដងផ្លូវផងដែរ។នៅឯកោះតៃវ៉ាន់ភាគខាងជើង ដើម​ឈើ​មួយ​ដើម​ដែល​ត្រូវ​បាន​ព្យុះ​ទីហ្វុង Kong​ Rey បោកបក់រលំបាក់​បិទ​ផ្លូវ​ក្នុង​ស្រុក Songshan ទីក្រុង​តៃប៉ិ។ ខណៈរូបថតបានបង្ហាញសកម្មភាពកម្មករ បាន​យក​ដើម​ឈើ​មួយ​ដើម​ដែល​ធ្លាក់​ពីលើ​រថយន្ត​ចត​នៅ​ក្នុង​សង្កាត់ Yonghe ទីក្រុង New Taipei ចេញ។តំបន់ផ្សេងទៀត ក្នុងនោះកំណាត់ផ្លូវទៅកាន់ប្រាសាទ Ci-hui ក្នុងស្រុក Banqiao ទីក្រុង New Taipei ត្រូវបានគេឃើញនៅម្ខាងផ្លូវ បន្ទាប់ពីត្រូវបានខ្យល់បក់បោកយ៉ាងខ្លាំង និងមានការបាក់ដីបិទផ្លូវភ្នំមួយនៅជិតទីប្រជុំជន Jianshi ស្រុក Hsinchu ។

ទន្ទឹមនោះភ្លើង​ចរាចរណ៍​ក្រុង Taichung ក៏ត្រូវ​ខ្យល់​បក់​បោករលំ។ ការ​រអិល​បាក់​ដី​មួយ​បាន​ហូរ​កាត់​ផ្លូវ​ឧស្សាហកម្ម​មួយ​ក្នុង​ទីប្រជុំជន Renai ស្រុក Nantou។ រីឯក្នុងទីក្រុងតៃណានវិញ រូបភាពបានបង្ហាញបុគ្គលិកក្រុមហ៊ុនតៃវ៉ាន់ ផៅវ័រ ជួសជុលខ្សែអគ្គិសនីដែលខូចខាតដោយព្យុះទីហ្វុង Kong Rey នេះ។ដោយឡែក នៅឯតៃវ៉ាន់ខាងកើតវិញ លំនៅដ្ឋានមួយត្រូវបានជន់លិចនៅក្រុង Shoufeng។ ផ្លូវមួយក្នុងក្រុង Sinchen Township ក៏ពោរពេញដោយបំណែកនៃដំបូលប្រក់ស័ង្កសីដែលបក់បោកដោយខ្យល់បក់ខ្លាំងដែលនាំមកដោយព្យុះទីហ្វុង Kong-rey។ ទន្លេ Xiuguluan ក៏បានបាក់ច្រាំងទន្លេនៅស្រុក Hualien ផងដែរ។គួរឲ្យដឹងដែរថា អាជ្ញាធរតៃវ៉ាន់ក៏បានប្រកាសផ្អាក និងពន្យារពេលជើងហោះហើរទាំងក្នុងស្រុក និងអន្តរជាតិរាប់រយជើងផងដែរ ដើម្បីបង្ការគ្រោះថ្នាក់ផ្សេងៗដែលអាចកើតឡើងដោយយថាហេតុ៕

សម្របសម្រួលអត្ថបទដោយ៖​ ផល្លីកា