ថៅកែហាងពេជ្រ លោកស្រី ទ្រី ដាណា បានបង្ហាញអារម្មណ៍រំភើបចិត្ត ក្រោយកូនស្រីតែមួយ ដាណា ភីន ទទួលបាននិទ្ទេស A ក្នុងលទ្ធផលប្រឡងថ្នាក់មធ្យមសិក្សាទុតិយភូមិ ឆ្នាំ ២០២៤ ដោយតាមរយៈវីដេអូដែល លោកស្រី ទ្រី ដាណា បានបង្ហោះចែកចាយក្នុងបណ្ដាញសង្គមមួយនេះទទួលបានការចែករំលែកយ៉ាងច្រើន ព្រមទាំងមានអ្នកចូលរួមរំភើបអបអរសារទរថែមទៀតផង។

ក្នុងនោះ លោកស្រី ទ្រី ដាណា បានរៀបរាប់ពីអារម្មណ៍ក្នុងនាមជាម្ដាយដែលឃើញកូនទទួលបានជោគជ័យបែបនេះថា ៖ «រំភើបណាស់កូន ដាណា ភីន បាននិទ្ទេស A ម៉ាក់ចង់ស្រក់ទឹកភ្នែកហើយ។ ការខិតខំប្រឹងប្រែងរបស់កូនទាំងថ្ងៃទាំងយប់គ្មានពេលសម្រាក ទីបំផុត កូនទទួលបានតាមបំណងហើយ។ នេះជាកាដូធំបំផុតសម្រាប់ម៉ាក់។ កូនធ្វើបានល្អណាស់ សង្ឃឹមថាកូន នឹងខំប្រឹងបន្តទៀតក្នុងជីវិតនៅសាកលវិទ្យាល័យ ដើម្បីជាទំពំាងស្នងឫស្សីដ៏ល្អរបស់សង្គមជាតិ»។

គួរបញ្ជាក់ផងដែរថា ដាណា ភីន គឺជាកូនស្រីច្បងតែមួយគត់របស់ លោកស្រី ទ្រី ដាណា ដោយកូនស្រីរូបនេះជាក្មេងម្នាក់ដែលប្រកបដោយគន្លងធម៌ចេះច្បាប់បង្គាប់ម្ដាយចាស់ទុំ ព្រមទាំងរៀនពូកែថែមទៀតផង បើទោះបីជានាងមានជីវភាពធូរធារក៏ពិតមែន តែ ដាណា ភីន នៅតែបង្ហាញភាពសាមញ្ញាមិនដែលទាមទារសំភារៈនិយមអ្វីពីម្ដាយនោះទេ ដែលត្រង់ចំណុចនេះហើយបានធ្វើឲ្យគ្រប់គ្នាកោតសរសើរពីឆន្ទះ និងការខិតខំប្រឹងប្រែងរៀនសូត្ររបស់យុវតីរូបនេះផងដែរ៕ សម្រួលដោយ៖ Sun Darasy