ករណីឆបោកដ៏ធំរបស់ក្រុមហ៊ុន The Icon Group កំពុងក្លាយជាប្រធានបទដ៏ក្តៅគកុកមួយនៅក្នុងប្រទេសថៃ ហើយអាជ្ញាធរមានសមត្ថិកិច្ចក៏កំពុងវែកមុខ និងស្រាវជ្រាវរកជនជាប់ចោទ ខណៈមានជនរងគ្រោះរហូតដល់ទៅជាង ១០០០ នាក់ ជាពិសេសនោះគឺគេសង្ស័យថាមានមេក្លោងសុទ្ធតែជាតារាល្បីៗប្រចាំប្រទេសថែមទៀតផង។

មកដល់ពេលនេះមានជនជាប់ចោទចំនួន ១៨ នាក់ដែលប៉ូលិសថៃបានឃាត់ខ្លួនទៅសួរចម្លើយនៅទីស្នាក់ការស៊ើបអង្កេតកណ្ដាលកាលពីយប់មិញនេះ ដោយត្រូវស្នាក់នៅបន្ទប់ឃុំឃាំងដើម្បីរង់ចាំការសាកសួរចម្លើយ។ ហើយសមត្ថកិច្ចនឹងបញ្ជូនខ្លួនជនជាប់ចោទទាំង ១៨ រូបនេះឡើងតុលាការនៅថ្ងៃទី១៨ ខែតុលា ស្អែកនេះដើម្បីអនុម័តទោសចំពោះមុខចៅក្រម។

ដោយឡែកក្នុងករណីឆបោកទ្រង់ទ្រាយធំនេះ ត្រូវបានដឹងថាមានមនុស្សចំនួន ១៨ នាក់ទៀត ដែលជាអ្នកពាក់ព័ន្ធសំខាន់ៗជាមួយនឹងករណីនេះ ដោយក្នុងនោះមានតារាប្រុសស្រីចំនួន៣នាក់ ត្រូវបានមហាជនចាប់អារម្មណ៍តាមដានខ្លាំងជាងគេ ដោយក្នុងនោះមានលោក Kan Kantathavorn ដែលជាពិធីករល្បីល្បាញមួយរូប, តារាស្រី Min Pechaya ព្រមទាំងតារាប្រុសជើងចាស់ Sam Yuranunt ផងដែរ។  

តារាប្រុសស្រីទាំង៣ នេះត្រូវបានគេសង្ស័យថាមានមុខតំណែងធំៗនៅក្នុងក្រុមហ៊ុននេះ ព្រោះកន្លងមកពួកគេហាក់មានសកម្មភាពច្រើនណាស់ទាក់ទងនឹងដំណើរការរបស់ក្រុមហ៊ុន។ ផ្ទុយទៅវិញខណៈរឿងកំពុងកើតឡើងអ្នកទាំង៣នេះក៏បានចេញមុខមកបកស្រាយថាខ្លួនគ្រាន់តែជាអ្នកតំណាងផលិតផលប៉ុណ្ណោះ មិនមានសិទ្ធិអ្វីធំដុំនៅក្នុងក្រុមហ៊ុនឡើយ ប៉ុន្តែក្រោយពីស៊ើបអង្កេតតុលាការក៏បានចេញដីកាឃាត់ខ្លួនពួកគេទាំង៣ នាក់ដើម្បីស្រាវជ្រាវ និងបន្តចាត់ការតាមនិតិវិធី៕