បណ្ដាអ្នកគាំទ្រមិនតិចអ្នកនោះទេបានសម្ដែងអារម្មណ៍រំភើបចិត្តយ៉ាងខ្លាំង ខណៈបានឃើញនូវរូបភាពប៉ុន្មានសន្លឹករបស់ កញ្ញា រឿន ណាត ត្រូវបានគូស្នេហ៍ លោក លាវ វេងហួរ ពញ្ញាក់អារម្មណ៍លុតជង្គង់សុំនាងរៀបការនៅមុខប្រាសាទអង្គរវត្តយ៉ាងរ៉ូមែនទិច ក្រោយអ្នកទាំងពីរមានទំនាក់ទំនងស្នេហ៍បើកចំហបានជិត ១ឆ្នាំ ដោយរូបភាពនេះបានធ្វើឲ្យអ្នកគាំទ្រពិសេសមិត្តនារីៗជាច្រើនបានលួចច្រណែន និងផ្ទុះការចាប់អារម្មណ៍ខ្លាំងពេញបណ្ដាញសង្គម។

ក្នុងនោះ លោក លាវ វេងហួរ បានបង្ហោះនូវរូបភាពនៃសកម្មភាពសុំរៀបការអមជាមួយសំណេរយ៉ាងផ្អែមល្ហែមថា៖ «ថ្ងៃកំណើតដ៏សែនពិសេស អរគុណអូនដែលបានចូលមកជីវិតបង ដែលបានធ្វើឲ្យជីវិតបងមានសម្រស់និងមានន័យ បងសន្យាថាបងនឹងការពារបេះដូងអូនអស់មួយជីវិត»។

ក្រោយពីបានឃើញបែបនេះហើយមានហ្វេនៗក៏ដូចជាមិត្តរួមអាជីពសិល្បៈជាច្រើនបានចូលទៅស៊ែរចែករំលែកព្រោងព្រាត និងបានចូលខមិនអបអរសាទររំភើបជំនួសអ្នកទាំងពីរ ថាគូនេះពិតជាស្រស់ស្អាតសមគ្នាណាស់ ព្រមទាំបន្តរង់ចាំដំណឹងអ្នកទាំងពីរនឹងដឹកដៃគ្នាចូលរោងការឆាប់ៗខាងមុខនេះផងដែរ៕ សម្រួលដោយ៖ Sun Darasy