មហាជនជាច្រើនបានសម្ដែងអារម្មណ៍រំភើប និងភ្ញាក់ផ្អើលយ៉ាងខ្លាំង ក្រោយទទួលបានព័ត៌មានពីផេកផ្លូវការ Olympic Cambodia បានបង្ហាញថា កញ្ញា ពេជ្រ ចរណៃ នឹងមានវត្តមានចូលរួមប្រកួតក្នុងព្រឹត្តិការណ៍កីឡាយុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី” ក្នុងន័យដើម្បីលើកតម្កើង និងផ្សព្វផ្សាយក្បាច់គុនខ្មែរ។

ក្នុងនោះ កញ្ញា ពេជ្រ ចរណៃ ក៏បានបង្ហោះសារមួយក្នុងបណ្ដាញសង្គមយ៉ាងមានអត្ថន័យថា៖ «បើសិនជាយើង ! មានឱកាសធ្វើជាបុគ្គលល្បីហើយ យើងគួរតែផ្សព្វផ្សាយអ្វីដែលជាប្រយោជន៍ដល់សង្គជាតិ វប្បធម៌ និងជាគំរូល្អដល់ អ្នកគាំទ្រ» ដោយនាពេលកន្លងមក កញ្ញា ពេជ្រ ចរណៃ មិនត្រឹមតែជាតារាសម្តែងដ៏មានទេពកោសល្យតែមួយមុខប៉ុណ្ណោះទេ នាងក៏ជាគ្រូបង្ហាត់ក្បាច់គុនល្បុក្កតោខ្មែរមួយរូប ដែលតែងតែចូលរួមសកម្មភាពលរួមចំណែកលើកស្ទួយក្បាច់គុនបុរាណខ្មែរ តាមរយៈការសម្តែងលើឆាកព្រឹត្តិការណ៍ធំនានាថែមទៀតផង។ 

គួរបញ្ជាក់ផងដែរថា ការរៀបចំការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្តេចបវរធិបតី» ក្នុងគោលដៅ អភិរក្ស និងអភិវឌ្ឍន៍យុទ្ធគុន ខ្មែរបុរាណ ដែលបុព្វបុរសដូនតា បានបន្សល់ទុក ដោយការប្រកួតនេះធ្វើឡើងក្រោមគំនិតផ្ដួតផ្ដើមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រព្រឹត្តិនៅថ្ងៃ១៨ ដល់ថ្ងៃទី២០ ខែតុលា ឆ្នាំ២០២៤ នៅវិមានពហុកីឡដ្ឋានជាតិអូឡាំពិក៕ សម្រួលដោយ៖ Sun Darasy