កម្មវិធី Met Gala បានប្រព្រឹត្តឡើងជាថ្មីម្តងទៀតនៅឯសារមន្ទីរ The Metropolitan Museum Of Art នាទីក្រុង New York សហរដ្ឋអាមេរិក ដែលជាព្រឹត្តិការណ៍ដ៏អស្ចារ្យប្រចាំឆ្នាំ ២០២៤នេះ ប្រមូលផ្តុំដោយតារាសម្តែង អ្នកចំរៀង អ្នកជំនួញ និង ធុរជនល្បីៗបានអញ្ជើញមកចូលរួម និងបានរៀបចំច្នៃម៉ូតសម្លៀកបំពាក់ប្លែកៗក្រោមប្រធានបទ Sleeping Beauties និង Reawakening Fashion។យ៉ាងណាមិញកម្មវិធី Met Gala 2024 ត្រូវបានមើលឃើញមានតារាប្រុស-ស្រីល្បីឈ្មោះ ១០ រូបហាក់មានភាពលេចធ្លោនិងប្លែក បែបច្នៃប្រឌិតជាងគេ ព្រមទាំងក្លាយជាទីចាប់អារម្មណ៍ខ្លាំងនៅលើបណ្ដាញសង្គម ដោយពួកគេបានច្នៃម៉ូតសម្លៀកបំពាក់ប្លែកភ្នែក ទាំងការផាត់មុខ ស្ទាយ៍សក់ ពោលគឺមើលទៅស្រស់ស្អាត និងស័ក្តិសមបំផុតមិនចេះស៊ាំ ជាមួយនឹងប្រធានបទតែម្តង។ តារាប្រុស-ស្រីល្បីឈ្មោះទាំង១០នោះរួមមាន៖ ទី១. Cardi B៖ គ្រងឈុតរ៉ូបស្បៃពណ៌ខ្មៅវែង និងលាតសន្ធឹងដ៏ធំ ថែមទាំងយកស្បៃមករុំនៅលើក្បាល ដើម្បីបង្កើនសម្រស់កាន់តែប្លែក និងទាក់ទាញ។ ២. Elle Fanning ៖ គ្រងឈុតរ៉ូបថ្លាចាំងពន្លឺនិងបន្ថែមរូបសត្វចាបនៅលើស្មាទាំងសងខាង បង្អួតសម្រស់ដូចជាព្រះនាងតូច។ ៣. Nicki Minaj៖ គ្រងឈុតរ៉ូបពណ៌លឿងទុំ ត្រឹមជង្គង់ អមជាមួយផ្កាជ័រច្រើនចម្រុះពណ៌ មើលមួយភ្លែតប្រៀបដូចជាតុក្កតា Barbie អ៊ីចឹង។ ៤. Zendaya៖ គ្រងឈុតរ៉ូបវែងអូសដីពណ៌ខ្មៅ បន្ថែមផ្កាក្រដាសមួយបាច់ច្នៃពាក់នៅលើសក់ ដើម្បីបង្កើនសម្រស់ និងភាពខុសប្លែកពីតារាផ្សេងៗ។

៥. Lana Del Rey៖ គ្រងឈុតរ៉ូបពណ៌ទឹកមាសស្រាលដែលរំលេចនូវមែកឈើជ័រពេញមួយតួខ្លួន និងបន្ថែមស្បៃគ្របមុខមួយទៀត ឈុតនេះហាក់សាមញ្ញបន្តិចប៉ុន្តែមិនធម្មតានោះទេ។ ៦. Tyla៖ ប្លែកឈ្នះដាច់គេ ខណៈរ៉ូបរបស់នាងបានយកខ្សាច់មកបិតពីលើពេញមួយតួខ្លួនតែម្តង បង្កើនភាពឆ្ងល់និងមានសំនួរជាច្រើនថាតើអ្នកច្នៃម៉ូដធ្វើដូម្តេចទើបចេញបែបនេះ។ ៧. Sydney Sweeney៖ មើលស្ទើរតែមិនចង់ស្គាល់ខណៈនាងបានផ្លាស់ប្តូរម៉ូតសក់ ដើម្បីឲ្យសាកសមជាមួយរ៉ូបពណ៌ទឹកសមុទ្រលម្អនូវផ្កាតូចៗរាប់រយទង ដើម្បីបង្កើនភាពលេចធ្លោមួយកម្រិតទៀត។ ៨. Gigi Hadid៖ គ្រងឈុតរ៉ូបពណ៌សសំយេះស្មា វែងអូសដីដោយរំលេចនូវផ្កាពណ៌លឿងជាច្រើនទងជួយបង្កើនសម្រស់កាន់តែអស្ចារ្យផងដែរ។

៩. Camila Cabello៖ គ្រងឈុតរ៉ូបពណ៌ទឹកប្រាក់ជាមួយនឹងការបាក់ឌិនត្បូងគ្រីស្តាល់ជាច្រើនគ្រាប់នៅលើនោះ មើលទៅពិតជាស្រស់ស្អាតនិងលេចធ្លោ ព្រមជាមួយកាបូបតូចដែលជាដុំទឹកកកមានផ្កាកុលាបកកខាងក្នុងមួយទង។ ១០. Altonmason៖ ជះរាងសង្ហាខ្លាំងណាស់ ខណៈគ្រងឈុតអាវធំ និងខោពណ៌ខ្មៅដែលមានសាច់ក្រណាត់សសៃអំបោះ ជាមួយនឹងក្រណាត់សូត្រសុទ្ធពណ៌ខ្មៅក្រវាត់ចង្កេះ អមជាមួយអាវធំពីលើមួយទៀត។ ដូច្នេះហើយទើបធ្វើឲ្យកម្មវិធី Met Gala ពីមួយឆ្នាំទៅមួយឆ្នាំ កាន់តែទទួលបានប្រជាប្រិយភាព និង មានអ្នកចូលរួមច្រើន ដោយសារ Concept កម្មវិធី និង ប្រធានបទនីមួយៗគឺប្លែករៀងរាល់ឆ្នាំតែម្តង៕