លោក Tran Qui Thanh អតីតប្រធានក្រុមហ៊ុនផលិតភេសជ្ជៈឈានមុខគេមួយនៅប្រទេសវៀតណាម គឺក្រុមហ៊ុន Tan Hiep Phat រួមជាមួយនឹងកូនស្រីពីរនាក់របស់លោក នឹងត្រូវកាត់ទោសនៅខែក្រោយនេះហើយ ក្នុងសំណុំរឿងពាក់ព័ន្ធនឹងការចោទប្រកាន់ពីបទលួចបន្លំប្រាក់ចំនួនជាង ១ទ្រីលានដុង ប្រមាណ ៤២លានដុល្លារអាម៉េរិក។

 ជនជាប់ចោទទាំងបីនាក់ជាគ្រួសារតែមួយនេះ នឹងត្រូវបានតំណាងដោយមេធាវីចំនួន ៤នាក់ នៅក្នុងតុលាការប្រជាជនទីក្រុងហូជីមិញ ខណៈដែលស្ថាប័នចំនួន ៣៥ ពាក់ព័ន្ធនឹងករណីនេះក៏នឹងធ្វើការបង្ហាញខ្លួននៅក្នុងតុលាការនៅពេលនោះផងដែរ។ ក្រុមរដ្ឋអាជ្ញាវៀតណាមបានចោទប្រកាន់ថា លោក Thanh និងកូនស្រីរបស់លោកពីរនាក់ទៀតបានផ្តល់ប្រាក់កម្ចីដល់បុគ្គលមួយចំនួនក្នុងអត្រាការប្រាក់ខ្ពស់ប្រចាំខែ ៣% ហើយជំនួសឱ្យការទទួលបានប្រាក់កម្ចីតាមកិច្ចសន្យាភ្ជាប់ដោយវត្ថុបញ្ចាំនោះ លោក Thanh បានបង្ខិតបង្ខំអ្នកខ្ចីឱ្យចុះហត្ថលេខាលើកិច្ចសន្យាលក់ទ្រព្យសកម្មរបស់ពួកគេ មកឱ្យខ្លួនលោកផ្ទាល់ ដោយផ្ដល់តម្លៃថោក ក្រោមតម្លៃទីផ្សារទៅទៀត។

ក្រុមរដ្ឋអាជ្ញាវៀតណាមបានបន្ថែមថា នៅពេលអ្នកខ្ចីបានសងថ្លៃដើម និងការប្រាក់ពេញលេញរួចហើយ លោក Thanh ត្រូវបានគេរាយការណ៍ថា បានបដិសេធមិនព្រមប្រគល់ទ្រព្យបញ្ចាំទៅឱ្យម្ចាស់ដើមគេវិញទេ ដោយអះអាងថា អ្នកខ្ចីបានបាត់បង់សិទ្ធិទទួលបានទ្រព្យរបស់ពួកគេមកវិញហើយ ដោយសារតែពួកគេបានបំពានលើកិច្ចសន្យា។ លោក Thanh ក៏ត្រូវបានចោទថា បានដាក់សម្ពាធលើអ្នកខ្ចីប្រាក់ឱ្យធ្វើការទូទាត់ចំនួនប្រាក់ខ្ពស់ជាងប្រាក់ដើមដែលបានព្រមព្រៀងគ្នាផងដែរ។ ក្រុមគ្រួសារនេះត្រូវបានចោទប្រកាន់ថាយកថវិកាចំនួន ៤២លានដុល្លារ ចាប់ពីខែ មករា ឆ្នាំ២០១៩ ដល់ ខែវិច្ឆិកា ឆ្នាំ២០២០ តាមរយៈគម្រោងបែបនេះ ហើយពេញមួយដំណើរការស៊ើបអង្កេតករណីនេះ លោក Thanh និងកូនស្រីពីរនាក់ របស់លោកតែងតែបដិសេធចំពោះការចោទប្រកាន់ទាំងនេះ។ តុលាការរបស់ប្រជាជនទីក្រុងហូជីមិញ នឹងបើកសវនាការចាប់ពីថ្ងៃទី២៣-២៥ ខែមេសាខាងមុខនេះ ជុំវិញសំណុំរឿងរបស់លោក Thanh អាយុ ៧១ ឆ្នាំ និងកូនស្រីរបស់លោកពីរនាក់ទៀត គឺលោកស្រី Tran Uyen Phuong អាយុ ៤៣ ឆ្នាំ ជាអគ្គនាយករង ក្រុមហ៊ុនតាន់ ហៀប ផាត និង លោក ស្រី Tran Ngoc Bich អាយុ ៤០ ឆ្នាំជាអតីតនាយកក្រុមហ៊ុនមួយនេះផងដែរ៕