ចក្រភពអង់គ្លេសបានប្រកាសផ្តល់ប្រព័ន្ធអនុគ្រោះពន្ធថ្មី UK’s Developing Countries Scheme (DCTS) ជំនួស UK’s Generalized Scheme Of Preference (GSP) ក្នុងគោលបំណងគាំទ្រដល់កំណើនសេដ្ឋកិច្ចប្រកបដោយចីរភាព ក្នុងបណ្តាប្រទេសកំពុងអភិវឌ្ឍ រួមទាំងប្រទេសអភិវឌ្ឍតិចតួច ក្នុងនោះក៏មានប្រទេសកម្ពុជាដែរ។ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម។

ក្នុងនោះរដ្ឋាភិបាលនៃចក្រភពអង់គ្លេសបន្ថែមលើអត្រាពន្ធសូន្យ និងមិនកម្រិតបរិមាណ (Duty-Free & Quota-Free) ដែលប្រទេសអភិវឌ្ឍតិចតួច រួមទាំងប្រទេសកម្ពុជាធ្លាប់ទទួលបាន ចំណែកឯប្រព័ន្ធអនុគ្រោះពន្ធថ្មីនេះ (DCTS) នឹងផ្ដល់ភាពងាយស្រួលបន្ថែមទៀតតាមរយៈការធ្វើសេរីភាវូបនីយកម្មវិធានដើមកំណើតទំនិញ និងការធ្វើសាមញ្ញកម្មលើលក្ខខណ្ឌតម្រូវ ដែលក្នុងនោះបានអនុញ្ញាតឱ្យប្រើប្រាស់តម្លៃបន្ថែមក្នុងស្រុក (Local content) ត្រឹម ២៥% (តម្លៃវត្ថុធាតុដើមនាំចូលសម្រាប់ប្រើប្រាស់ (Non-originating content) រហូតដល់ ៧៥% ឬការផ្លាស់ប្តូរចំណាត់ថ្នាក់បន្ទាត់ពន្ធ រហូតដល់៤ខ្ទង់ ទៅ៦ខ្ទង់។

តាមរយៈសេចក្តីជូនដំណឹងនេះដែរ ក្រសួងពាណិជ្ជកម្មបានបញ្ជាក់ថា ដើម្បីទទួលបានការអនុគ្រោះពន្ធពីចក្រភពអង់គ្លេស ផលិតករ ឬអ្នកនាំចេញទាំងអស់ ត្រូវអនុវត្តតាមវិធានការដើមកំណើតទំនិញរបស់ចក្រភពអង់គ្លេស៕

សម្រួលអត្ថបទដោយ៖ Puthseyha