ដោយ: ធន់ សេងហុង (THUN Senghong)

កាលពីល្ងាចថ្ងៃទី ១៦ ខែកក្កដា ក្រុមសម្ព័ន្ធគណបក្សទាំងប្រាំបី បានយល់ព្រមស្នើមេដឹកនាំគណបក្សឆ្ពោះទៅមុខ លោក Pita Limjaroenrat ជាបេក្ខភាពនាយករដ្ឋមន្ត្រីម្តងទៀត ក្នុងការបោះឆ្នោតជ្រើសរើសនាយករដ្ឋមន្ត្រីនៅជុំបន្ទាប់។ ប៉ុន្តែប្រសិនបើលោក Pita មិនទទួលបានការគាំទ្រគ្រប់គ្រាន់ដូចគ្រាមុន គណបក្សភឿថៃនឹងដាក់បេក្ខភាពរបស់ខ្លួនវិញម្តង។

លោក Pita មេដឹកនាំ និងជាបេក្ខភាពនាយករដ្ឋមន្ត្រីបក្សឆ្ពោះទៅមុខដែលបានឈ្នះឆ្នោត បាននិយាយបន្ទាប់ពីកិច្ចប្រជុំនៃសម្ព័ន្ធរបស់ខ្លួនថា គណបក្សទាំងប្រាំបី នឹងតែងតាំងលោកជានាយករដ្ឋមន្ត្រី នៅសម័យប្រជុំពេញអង្គនៃរដ្ឋសភា និងព្រឹទ្ធសភាដែលតែងតាំងដោយយោធាសម្រាប់ជុំទីពីរ ដែលប្រព្រឹត្តទៅនៅថ្ងៃទី ១៩ ខែកក្កដា។

« ប្រសិនបើ​សំឡេង​គាំទ្រ​មិន​កើនឡើង​ខ្លាំង​ទេ យើង​នឹង​ដក​ថយ។ ភឿថៃនឹងចូលខ្លួនមកជំនួសម្តង» ។ ​លោក Pita បាននិយាយក្រោយបញ្ចប់កិច្ចប្រជុំជាមួយសម្ព័ន្ធរបស់ខ្លួន។

ចំណែកលោក Srettha Thavisin ដែលជាបេក្ខភាពនាយករដ្ឋមន្ត្រីមួយរូប ក្នុងចំណោមបេក្ខភាពនាយករដ្ឋមន្ត្រីទាំងបីរបស់គណបក្សភឿថៃ បានប្រកាសថា លោកបានត្រៀមខ្លួនរួចជាស្រេច ដើម្បីក្លាយជានាយករដ្ឋមន្ត្រី ប្រសិនបើលោកឈ្នះការជឿទុកចិត្ត ពីគណបក្សឱ្យកាន់តំណែងកំពូលនេះ។

លោកអះអាងថា ៖ « យើងនៅបក្សភឿថៃបានពិភាក្សាលើបញ្ហានេះអស់រយៈពេលបួនខែហើយ ប្រសិនបើខ្ញុំមិនទាន់ត្រៀមខ្លួនសម្រាប់ការងារនេះទេ ខ្ញុំនឹងមិនជាប់ឈ្មោះជាបេក្ខជននាយករដ្ឋមន្ត្រីមួយ ក្នុងចំណោមបេក្ខភាពនាយករដ្ឋមន្ត្រីទាំងបីនាក់នោះទេ»។ 

បក្សឆ្ពោះទៅមុខបានឈ្នះការបោះឆ្នោតសកល នៅថ្ងៃទី ១៤ ខែឧសភា ជាមួយនឹងអាសនៈសភាតំណាងរាស្ត្រ ចំនួន ១៥១រូប ហើយគណបក្សភឿថៃឈរនៅលំដាប់បន្ទាប់ ដែលមានអសនៈ ១៤១រូប។

គណបក្សទាំងប្រាំបីបានច្រានចោលការលើកឡើងរបស់សមាជិកព្រឹទ្ធសភាមួយចំនួន ដែលថាពួកគេមិនអាចដាក់ឈ្មោះលោក Pita ជាបេក្ខជននាយករដ្ឋមន្ត្រីឡើងវិញបានទេ ដោយសារលោកបរាជ័យក្នុងការទទួលបានសំឡេងភាគច្រើនពីសភា និងព្រឹទ្ធសភាកាលពីនៅថ្ងៃទី ១៣ ខែកក្កដា។

លោក Pita បានបង្ហាញជំហរថា ៖«ការតែងតាំងនាយករដ្ឋមន្ត្រីមិនមែនជាការដាក់ញត្តិទេ ដូច្នេះហើយបទប្បញ្ញត្តិនៃសម័យប្រជុំសភា ដែលហាមឃាត់ការបញ្ជូនសំណើឡើងវិញ មិនត្រូវបានអនុវត្តចំពោះការតែងតាំងនាយករដ្ឋមន្ត្រី »។

លើសពីនេះ សម្ព័ន្ធភាពទាំងប្រាំបីបានបញ្ជាក់ថា បក្សឆ្ពោះទៅមុខតែឯងទេ ដែលបានស្នើឱ្យធ្វើវិសោធនកម្មមាត្រា ២៧២ នៃរដ្ឋធម្មនុញ្ញ ដើម្បីដកសមាជិកព្រឹទ្ធសភាដែលត្រូវបានតែងតាំងពីសិទ្ធិ ក្នុងការចូលរួមជាមួយតំណាងជាប់ឆ្នោតបោះឆ្នោតជ្រើសរើសនាយករដ្ឋមន្ត្រី។ លោក Pita បាន​និយាយ​ថា សម្ព័ន្ធមិត្ត​ចម្រុះ​ប្រាំពីរ​ផ្សេង​ទៀត​ មិន​មាន​ពាក់ព័ន្ធ​នឹង​ការ​ធ្វើ​វិសោធនកម្ម​ដែល​បាន​ស្នើ​ឡើង​នោះ​ទេ។

បក្សឆ្ពោះទៅមុខ បានស្នើការធ្វើវិសោធនកម្មនេះ បន្ទាប់ពីសមាជិកព្រឹទ្ធសភាភាគច្រើន បានបដិសេធការតែងតាំងលោក Pita ជានាយករដ្ឋមន្ត្រីកាលពីសប្តាហ៍មុន។ ប្រសិនបើគ្មានការចូលរួមពីសមាជិកព្រឹទ្ធសភាចំនួន ២៤៩នាក់ ដែលត្រូវបានតែងតាំងដោយរដ្ឋាភិបាលយោធាមុននោះ គណបក្សចម្រុះចំនួនប្រាំបីដែលរួមគ្នា ទទួលបានអាសនៈសភាសរុបចំនួន ៣១២ នឹងមានសំឡេងភាគច្រើន សម្រាប់នាយករដ្ឋមន្ត្រី។

បន្ទាប់ពីកិច្ចប្រជុំលោក Pita បានអះអាងថា គណបក្សរបស់លោកកំពុងព្យាយាម ដើម្បីទទួលបានការគាំទ្របន្ថែមទៀតពីសមាជិកព្រឹទ្ធសភា ហើយលោកសង្ឃឹមថានឹងទទួលបានសំឡេងគាំទ្រកាន់តែច្រើន ពីសមាជិកព្រឹទ្ធសភានៅជុំទីពីរនេះ។

បក្ស​ឆ្ពោះទៅមុខនៅតែរក្សាជំហរ​នឹង​ជំរុញ​ឲ្យ​មាន​ការ​ធ្វើ​វិសោធនកម្ម​ច្បាប់​ប្រមាថ​ព្រះមហាក្សត្រ (មាត្រា ១១២ នៃ​ក្រម​ព្រហ្មទណ្ឌ) ព្រោះ​វា​ជា​ការ​សន្យា​ចម្បង ​ក្នុង​យុទ្ធនាការ​បោះឆ្នោត​របស់​ខ្លួន។ សមាជិកព្រឹទ្ធសភា និងអ្នកតំណាងជាច្រើនបានប្រឆាំងយ៉ាងខ្លាំង ចំពោះការផ្លាស់ប្តូរនេះ ហើយបានលើកឡើងថា វាជាហេតុផលចម្បងសម្រាប់ការមិនគាំទ្រលោក Pita ជានាយករដ្ឋមន្ត្រីបន្ទាប់។

ប្រធានសភា Wan Muhamad Noor Matha បានកំណត់ជុំទីពីរ នៃការបោះឆ្នោតនាយករដ្ឋមន្ត្រីនៅថ្ងៃទី ១៩ និងជុំទីបីនៅថ្ងៃទី ២០ ខែកក្កដា។​

គួរបញ្ជាក់ថា នៅថ្ងៃទី១៩ ខែកក្កដា តុលាការធម្មនុញ្ញថៃ នឹងសម្រេចលើញត្តិដែលបានដាក់កាលពីសប្តាហ៍មុន ដោយគណៈកម្មការរៀបចំការបោះឆ្នោត ជុំវិញការចោទប្រកាន់បំពានច្បាប់ឃោសនាបោះឆ្នោត ដើម្បីស្វែងរកសេចក្តីសម្រេចរបស់តុលាការ ថាតើឋានៈសមាជិកសភារបស់មេដឹកនាំបក្សឆ្ពោះទៅមុខនេះ មិនត្រឹមត្រូវ ឬយ៉ាងណា?៕

ប្រភពដើម៖ ThmeyThmey