តាមរយៈសហព័ន្ធកីឡាប្រដាល់គុនខ្មែរក្រុមអត្តពលិកកីឡាករកម្ពុជាបានទទួលនូវប្រាក់រង្វាន់លើកទឹកចិត្តបន្ថែមពីរាជរដ្ឋាភិបាលកម្ពុជានៅព្រឹកថ្ងៃទី ២៧ ខែមិថុនាឆ្នាំ ២០២៣ នេះ។ សហព័ន្ធកីឡាប្រដាល់គុនខ្មែរបានឲ្យដឹងថា "ថ្នាក់ដឹកនាំគ្រូបង្វឹក កីឡាករ កីឡាការិនី របស់សហព័ន្ធកីឡាប្រដាល់គុនខ្មែរ និងសហព័ន្ធកីឡា ឃីក បុក ស៊ីង បានអញ្ជើញចូលរួមក្នុងពិធីប្រគល់ប្រាក់រង្វាន់លើកទឹកចិត្តរបស់រាជរដ្ឋាភិបាលកម្ពុជា ជួនអត្តពលិកជ័យលាភី គ្រូបង្វឹក គ្រូជំនួយ នៅថ្ងៃអង្គារ ១០ កើត ខែបឋមាសាឍ ឆ្នាំថោះ បញ្ចស័ក ព.ស ២៥៦៧ រាជធានីភ្នំពេញ ថ្ងៃទី២៧ ខែ មិថុនា ឆ្នាំ២០២៣នៅក្រសួងការពារជាតិ ។

សូមជម្រាបផងដែរថា បើទោះបីជាព្រឹត្តិការណ៍នៃការប្រកួតកីឡាស៊ីហ្គេមលើកទី ៣២ ឆ្នាំ ២០២៣ បានបញ្ចប់ទៅហើយក៏ពិតមែន ប៉ុន្តែរាជរដ្ឋាភិបាលនៅតែយកចិត្តទុកដាក់ និងធ្វើការផ្ដល់ជូនបន្ថែមនូវទឹកប្រាក់រង្វាន់លើកទឹកចិត្តជូនដល់អត្តពលិកកីឡាករ កីឡាការិនី ក៏ដូចជាថ្នាក់ដឹកនាំ ដែលពាក់ព័ន្ធនៅក្នុងព្រឹត្តិការណ៍កីឡាមួយនេះដើម្បីជាការលើកទឹកចិត្ត ក៏ដូចជាថ្លៃអំណរគុណទៅដល់អ្នកដែលពាក់ព័ន្ធទាំងអស់ ដែលបានចូលរួម ដែលបានលះបង់ទាំងកម្លាំងកាយ កម្លាំងចិត្តធ្វើឲ្យព្រឹត្តិការណ៍ Sea Games ដែលកម្ពុជាធ្វើជាម្ចាស់ផ្ទះបានបញ្ចប់ទៅយ៉ាងរលូន និងជោគជ័យបំផុត៕