ភ្នំពេញ៖ អបអរសាទរ សាលារៀនសុវណ្ណភូមិ បានផ្តល់អាហារូបករណ៍ ១០០% រយៈពេល ១២ឆ្នាំ ជូនដល់កុមារា សាន រតនៈ កូនប្រុសរបស់កីឡាករ យី សុខសាន្ត កីឡាករប៉ារ៉ាអត្តពលកម្ម នៃព្រឹត្តិការណ៍កីឡាអាស៊ាន​ប៉ារ៉ាហ្គេម​លើកទី​១២ ​ក្នុងការប្រកួតលើវិញ្ញាសា រត់ចម្ងាយ ៥០០០ម៉ែត្រ។

កន្លងមក កុមារា សាន រតនៈ ទទួលបានការចាប់អារម្មណ៍ខ្លាំងពីសំណាក់មហាជន តាមរយៈការស្រែកផ្តល់កម្លាំងចិត្តដល់ឳពុកដែលជាកីឡាករពិការភាព ជម្រើសជាតិកម្ពុជាកំពុងរត់ប្រកួតក្នុងព្រឹត្តិការណ៍កីឡាប៉ារ៉ាហ្គេមលើកទី១២ ដោយទឹកភ្នែក ធ្វើឲ្យមហាជនភាគច្រើនរំជួលចិត្តខ្លាំងជាមួយនឹងរូបភាពមួយនោះ។ បើទោះបី កីឡាករជន យី សុខសាន្ត មិនអាចទទួលបានជ័យលាភី ក៏ពិតមែនតែការខិតខំប្រឹងប្រែងនេះ បានធ្វើឲ្យប្រជាពលរដ្ឋកម្ពុជា ក៏ដូចជាថ្នាក់ដឹកនាំទាំងអស់បានឃើញ និងកោតសរសើរចំពោះកីឡាកររូបនេះជាខ្លាំង។

ហើយក្នុងនោះសម្តេច ហ៊ុន សែន នាយករដ្ឋមន្ត្រីកម្ពុជា ក៏ធ្លាប់បានប្រកាសឧបត្ថម្ភថវិកាចំនួន ៥០០០ដុល្លារអាមេរិក ជូនដល់កីឡាករជនពិការ យី សុខសាន្ត ផងដែរ៕