បន្ទាយមានជ័យ៖ បន្ទាប់ពីពលរដ្ឋបានធ្វើការរិះគន់នគរបាលអន្តោប្រវេសន៍ច្រកទ្វាអន្តរជាតិប៉ោយប៉ែត ត្រូវបានលោកឧបនាយករដ្ឋមន្ត្រីកែ កឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន ឲ្យកែប្រែឡើងវិញហាមយកថ្លៃឯកសារខុសពីរដ្ឋកំណត់ លើកឡើងនៅក្នុងថ្ងៃបិទអង្គសន្និបាតបូកសរុបការងារឆ្នាំ២០១៨ លើកទិសដៅឆ្នាំ២០១៩នៅសាលាខេត្តបន្ទាយមានជ័យនាពេលកន្លងទៅថ្មីនេះ។

លោកឧបនាយករដ្ឋមន្ត្រី បន្តថា៖ ក្រោយពេលប្រកាសទទួលភារកិច្ចថ្មីលោកនាយប៉ុស្តិ៍នគរបាលអន្តោប្រវេសន៍ច្រកទ្វាអន្តរជាតិប៉ោយប៉ែត ឃើញព័ត៌មានចុះផ្សាយដែលប្រជាពលរដ្ឋធ្វើការរិះគន់យ៉ាងខ្លាំងរាល់ការងារនៅ ច្រកទ្វារអន្តរជាតិប៉ោយប៉ែតការទារលុយថ្លៃធ្វើឯកសារលិខិតឆ្លងដែនដែលខុសពីគោលការណ៍រដ្ឋកំណត់។

លោកបានណែនាំថា៖ បើសិនជាកើតមានសុំឲ្យបញ្ឈប់រាល់សកម្មភាព ហើយលោកនាយប៉ុស្តិ៍ខឹម ចិន្ត្រា ត្រូវសម្រួលការងារឡើងវិញ និងខិតខំការងារឲ្យកាន់តែប្រសើឡើង ដែលយើងជាមន្ត្រីធ្វើការបម្រើប្រជាពលរដ្ឋ និងសង្គមនិងការពារសន្តិសុខ សណ្តាប់ធ្នាប់ជូនភ្ញៀវជាតិនិងអន្តរជាតិដែលឆ្លងកាត់ច្រកទ្វារអន្តរជាតិប៉ោយប៉ែតដែលចូលមកកំសាន្តនៅកម្ពុជា។

នៅក្នុងថ្ងៃបិទអង្គសន្និបាតនៅខេត្តបន្ទាយមានជ័យ លោកឧបនាយករដ្ឋមន្ត្រី កែ គឹមយ៉ាន ក៏បានរំលឹកបទបញ្ជារបស់ប្រមុខរាជរដ្ឋាភិបាល សម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ផងដែរថា ច្រកទ្វារអន្តរជាតិ គឺតម្រូវឲ្យមានស្ថាប័នតែ២ប៉ុណ្នោះ មានមន្ត្រីនគរបាលអន្តោប្រវេសន៍និងមន្ត្រីគយរដ្ឋាករទុកធ្វើការ ក្រៅពីនោះត្រូវដកចេញអោយអស់បើទុកវាកើតទៅជាឧបសគ្គរារាំងការធ្វើពាណិជ្ជកម្មទៅវិញទេ។

គួរបញ្ជាក់ផងដែរថា៖ នាពេលកន្លែងទៅថ្មីៗ នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត បានរងការរិះគន់យ៉ាងចាស់ដៃ ទាក់ទងការទារលុយថ្លៃវាយឯកសារលើសការកំណត់របស់រដ្ឋ ការបើកដៃឲ្យមេខ្យល់នាំពលរដ្ឋឆ្លងដែនខុសច្បាប់ និង យកលុយថ្លៃម៉ូតូឌុប ម៉ូតូកង់បីបង់ជាខែ និងជាថ្ងៃផងដែរ៕ អត្តបទ៖ សៅនៅ(តុង)